Shillong, Jymmang 15
U Kpa jong u Samla Trophimon, uba la ïap na ka jingsuba shah bom shah tied ha u Rangbah Shnong ka Pynter bad ki dkhot ka VDP, u la pynpaw ka jingpang mynsiem bad sngewsih halor kane ka jingjia bad u kwah ba ka aiñ kan leh ïa kaba donkam kumba u la ïohi ha ka durkhih ïa ka jingshisha, ba u khun jong u, u ïap na ka jingshah tied shah bom.
Haba kren sha ki lad pathai khubor ha ka 15 tarik u Jymmang 2026 ha Shillong Press Club, u Kpa u la ïathuh, ba u khun jong u, dei uba kyrteng u Trophimon, 27 snem ka rta bad u la don khun 2 ngut, hynrei u khlem sah lang shuh bad ka lok.
“Ki ong ba u Trophimon u la ïap, ba u bam ïit hynrei haba u peit ïa ka durkhih pat um lah ngeit, ba u khun jong u, un ïap noh tangba bam ïit bad un ïoh ïit ruh naei ban bam,” la ong u Kpa.
Nalorkata, u la ong “Ngam tip na kaei ka daw ba u khun, u shah shoh namar ngam don lang ha kata ka miet hynrei nga don ha ïing. Nga tip ha ka step jong ka 08 tarik u Ïaïong 2026, ba u khun u la ïap, haba la don ba wan buh da ki VDP ïa ka met jong u bad haba kylli ruh kita ki nongwan buh ki ong ym tip”.
U Kpa u la ïathuh ruh ba um ïohi ei-ei ba ka met jong u khun ka la mong ne-em, hynrei u ïohi ba ka dur ka dar la tap da ka snam suda.
Shuh shuh u la ïathuh, ba u khlem ïasah lang shuh la slem bad u khun naduh ba u dang kham rit bad ka ïing ruh ka kham ïajngai, hynrei une u khun pat da pang da shitom u shait wad ïa u.
Haba kylli halor ka jingphah bom hi ka kmie ha ka shnong ka thaw namar une u khun u tamsneng ha shnong ha thaw, u Kpa u la ong “Ngam don jingtip ïa kata bad haba mut ban leit peit khatduh ïa ka met u khun ruh, ngam ïohi shuh namar la dep tap ïa ka synduk da u Rangbah Shnong”.
U la ïathuh ruh ba um tip satia ba u khun u tamsneng ne kumno ha shnong ha thaw, namar ba u la ïashong khlad bad ka lok la slem bha ryngkat bad une u khun.
