Shillong, Jymmang 15
Ka Kong Rismilin Paliar na ka shnong Nongnah Dong Mawtaïem ha South West Khasi Hills District ka la ïathuh ba ha ka 12 tarik u Jymmang 2026 ka la don ka jingshah shoh ha ki ar ngut ki samla kynthei ïa ka khun jong ka Kong Joplin Paliar ha ka por ba ka dang bah ïa u khunlung ba dang shi snem khadwei bnai katba ka dang leit sha wah ban khlieng tiar, ha kaba u khunlung u la mynsaw jur.
Ka Kong Rismilin ka la ïathuh ba u khunlung u la mynsaw jur bad ki la kit noh sha jaka sumar ha Mawkyrwat hynrei na Mawkyrwat ki la phah noh sha Ganesh Das Hospital Shillong ban ai ka jingsumar kaba kham biang.
Shuh shuh ka la ong ba kine ki arngut ki dei na ka juh ka shnong bad ki dei ki khun jong u myntri shnong.
Haba kylli ïa ka daw ka la ïathuh ba man ka por ki wan ban pyndik ïa kane ka longïing hynrei kam pat jia ba kin ktah kti ïa ki khynnah kumta ki shu sngap.
Ka la ong ruh ba man ka por kine ki briew ki wan ban wad daw laiphew jait bad kynnoh ruh ba ki dei ki nongtuh khlem ki sakhi ba biang.
Ka la ïathuh ba ka daw ba mih ka jingbym ïa sngewtynnad ka dei naduh mynshwa ha kaba u Rangbah Shnong u la pan arphew hajar tyngka na ka Kong Rismilin Paliar kaba dei na ka skhim shna ïing bad ka la kyntait ban ai namar ka dei ka skhim ba wan na ka Sorkar kumta ka la sngewthuh ba dei tang na kata ka daw kan sa mih ka jingbym ïa sngewtynnad, ym tang katta wat ïa ka jingtrei shispah sngi ka khlem ïoh shuh ban leit trei naduh u snem 2017/2018.
“Mynta nga shu bylla ïap bylla im katba lah, nga wan hangne ruh da ka jingsngewkhia bad ki para shnong para thaw ki marjan marpa ki wan synñiang katba ki lah bad ki ai mynsiem ba ym dei ban shah namar u khun un poi sha ka jingïap bad ngi kyrmen ba un ïoh ïa ka jingkoit jingkhiah,” ka la ong.
Ka la ïathuh ba kita ki ar ngut kiba shoh ïa ka khun jong ka, ki dei ki khun jong u myntri shnong bad u myntri shnong ruh ïa ka Kong Rismilin Paliar u long nongshun bad mawjynthut haba ka ïaid ka ïeng naduh ba ka kyntait ban ai ïa ka arphew hajar tyngka na ka skhim shna ïing. Ka la kyntu ïa ki bor ka aiñ khamtam na ka tnad pulit ba kan ïarap lem ban shimkhia ha kaba ïadei bad kane ka jingshah thombor.
Ha kaba ïadei bad kane ka jingjia, ka la ïathuh ba na ka liang jong ki kim pat leit ban buh da ka jingujor ejahar namar mynta ki hap ban sumar shwa ïa u khunlung namar u don hapdeng ka jingmynsaw jur.
