Shillong, Jymmang 15
U Bah Sanbor Shullai uba dei u Myntri Sorkar bad ruh u MLA ka South Shillong Konstitwensi ha ka sngi Thohdieng u la hiar sha kawei na ki jaka ri khunswet na ka bynta ban noh synñiang ïa ki jingïarap kiba kynthup ïa ki marbam mardih, ki jaiñ, ki nep bad kiwei kiwei ki tiar. Kane ka jaka ri khunswet ka dei kaba don ha Mawsmai, Sohra kaba tip kum ka Borsing Children’s Home. Ka jingleit ai jingïarap jong u Bah Sanbor, ka dei ruh hadien ba u la dep ban ai jingkular ïa kane ka jaka ha ki bnai ba la lah, ha kaba u la lah pat ban pyndep ïa kane ka jingkular ha ka sngi Thohdieng.
Ïa kine ki song jingïarap u Bah Sanbor u la aiti ha u Pastor R Bareh ha ryngkat ka jingdonlang ki nongpeit ïa ki heprit ha ka jingïalang kaba rit ba la pynlong ha phyllaw jong kane ka jaka sah ki heprit.
Hashwa ban aiti ïa ki jingïarap, u Bah Sanbor ha ka jingkren u la ïathuh ba hadien ba u la wan jngoh ïa ki ha u bnai ba nyngkong mynta u snem u la dep ban kular ban sa wan biang ryngkat ki song jingïarap hynrei namar ka jingbun kam bad ka jingdon jong ka jingshong dorbar, kane ka kam ka la kham slem hynrei u sngew kmen pat ba u la lah ban pyndep ïa la ka kular.
“Nga la buh jingkynmaw hynrei hapdeng ki jingbunkam ngam shym la lah ban wan ha kine ki khyndiat bnai. Nga kmen ka mynsiem ba sa shisien nga ïoh ban donlang bad phi ryngkat bad kine ki jingai sngewbha,” u la ong.
U la pyntip ba nalor ki marbam kiba man ka sngi na ka bynta ki heprit u la wanrah ruh ki jingai sngewbha kum ka nep syaid, ki jaiñ siang, ki blanket, ki bilor um, ki towel nalor ki umsoh bad ki jingbam bad kiwei kiwei kiba dei na ka bynta ka jingdonkam kaba man ka sngi.
Ha kaba ïadei bad ka dorkhas kaba la aiti da u Pastor ban pynïoh ïa ka hall ban pynlong ïa ki jingai jinghikai na ka bynta ki khynnah hadien ba ki la pyndep ïa ka jingpule ne pass matrik khnang ba kin lah pat ban ïeng ha la ki jong ki kjat shwa ba kin mih na kane ka jaka sah, u Bah Sanbor u la ong ba un sa rah ïa kane ka jingtyrwa ha u Myntri Rangbah ka Jylla ryngkat ka jingkular ba un pynkohnguh ïa u ban shimkhia.
“Kum kine ki dei hok ban ïoh ïa ki jingkyrshan namar lada ym don kum kine ki jaka ri shaei kine ki heprit kin leit bad mano ban ri ban sumar ïa ki,” u la ong.
