Shillong, Jymmang 15
Ka Khasi Jaiñtia Presbyterian Synod Pdeng ka la pynrem jur halor ka jingshah siat ïap ki 3 ngut ki Pastor ha Manipur, da kaba kdew ba kane ka dei ka jingpynïap kaba shyrkhei bad ka jingleh khawpud pyrshah ïa ki nongïalam Balang kiba aiti ïa la ka jingim ban wanrah ka jingsuk bad ka bha ka miat ha ka longbriew manbriew.
Haba kren sha ki nongthoh khubor u Rev. H K Nongbsap uba long kum u Moderator ka KJP Synod Pdeng u la pynpaw ka jingsngewsih bad kyndit ban tip ïa kane ka khubor halor ka jingshah pynïap u Rev. Bumthang Sitlu, General Secretary barim ka Manipur Baptist Convention, u P. K. Kaung Lun bad u Pastor Poko Len.
U Pastor Nongbsap u la ong ba ka pait ka dohnud haba ïohi ïa kane ka jingjia bad u sngew ym lah ngeit bad ym lah mutdur ba ki nongïalam balang kiba ju ïaleh ban wanrah ka jingsuk ha ka imlang sahlang kin shah ngat ha kum kine ki jingthombor.
“Ka Synod ka ïeng ha ka jingïalong kawei bad ka pynrem jur ïa kum kine ki jingleh. Ka jingthombor pyrshah ïa ki shakri u Blei bad ka longbriew man briew ka dei ka jingthombor ïa ka imlang sahlang baroh kawei,”la ong u Pastor Nongbsap.
Shuh-shuh u la ong ruh ba kane ka jingpynïap ka dei ka jingleh khawpud bad u la phah ka khubor sngewlem sha ki bahaïing hasem kiba la mad ïa ka jingduh noh ïa ki baïeid bathoiñ jong ki bad ïa ka Balang baroh kawei ha kum kane ka por ba sngewsih kthang.
U Pastor Nongbsap u la pynpaw ruh ban buh jingdwai na ka bynta ba ki bahaïing kin ïoh ïa ka bor bad ka jingsuk bad pynpaw ka jingkyrmen ba u Blei un ai ha ki ïa ka jingshlur bad ka jingsuk ha kum kane ka por.
U Pastor Nongbsap u la kyntu ïa ki paidbah nongshong shnong ba kin kyntait ïa ka jingïashun ka jingïa isih, ka jingïasngewpher bad ka jingïakynad, hynrei ban long kiba ïa ïeid, ïa ngeit bad ban ïaleh ban wanrah ka jingïatylli bad jingïasuk.
U la pynpaw ruh ka jingsngewskhem ba ka jingsuk bad ka jingkmen kan jop ïa ka jingïaleh bad ki jingsniew ha kaba kut.
