Kat nang mih ki sngi, katta ka jingkiewdor ka nang tasam ha ka Ri baroh kawei. Naduh ka umphniang kali haduh ki marbam mardih, ka jingkiewdor ka la ktah lut ïa baroh khamtam ïa ki nongshong shnong ki bym da khlaiñ ha ka ïoh ka kot. Ngi kynmaw ba hashwa ka ilekshon MP ha u snem 2014, u Myntri Rangbahduh ba mynta, u Narendra Modi, u la leit khroh ‘vote’ kylleng ka Ri bad u da kob ruh ba lada jied ïa ka BJP, ki sngi ki basniew kin jah noh bad ki sngi ki babha lane kata ka ‘Acche Din’ kin synshar. “Achhe din aane waale hain” (ki sngi ki babha ki la jan wan) – la kyrhuh u Modi naduh na Kashmir shaduh sha Kanyakumari bad na Gujarat sha Arunachal Pradesh ha ka jingleit ïalap ilekshon ka jong u. Kyndeh ka mynsiem jong ki nongshong shnong bad ki la pynjop kput syndon ïa ka BJP da kaba ai 300 tam ki MP. Kaba kum kajuh ka la long ha ka ilekshon 2019, bad ruh ha ka ilekshon 2024, ha kaba ki paidbah ki la ai biang palat 240 tam ki MP tang ïa ka BJP marwei.
Ka por ka la nang ïaid. Ha kine ki khyndiat bnai, ngi ïohi ba mar ïa kut ka ilekshon ha ki san tylli ki jylla jong ka Ri, kata ha Assam, West Bengal, Tamil Nadu, Kerala bad Puducherry, ka la don ka jingkiewdor kynsan jong ka umphniang petrol bad diesel bad la sngewthuh ba shisien ba ka kiew ka dor jong ki umphniang, ka dor jong ki mar ki mata ruh kan sa kiew lut ha kylleng. Ka jingkiew dor jong ka umphniang ka la kylla long ka jingeh kaba khraw ïa ki nongshong shnong ba rit paid. Ka petrol bad ka diesel ki long ki mar kiba kongsan kiba ai bor ïa ka leit ka wan, ka rep ka riang, bad kiba bun ki karkhana. Haba ka dor jong ki ka kiew, ka jingktah ka paw ha jan man la ki bynta jong ka jingim ba man ka sngi, khamtam eh da ki longïing kiba pdeng bad kiba duna ka ïoh ka kot.
Kawei na ki jingktah kaba mardor bha na ka jingkiew dor jong ka umphniang ka long ka jingkiew dor jong ka leit ka wan. Ka bai kali paidbah, ka bai taksi, bad ka bai pynpoi marbam bunsien ka kiew haba ka umphniang ka la rem dor. Na ka bynta ki briew kiba leit jingleit man ka sngi ban leit trei ne leit skul, kane ka mut ban pynlut ïa ka bynta kaba kham heh jong ka kamai jong ki tang ban leit jingleit. Kito kiba shaniah ha ki kali shimet ruh ki ïaleh ban pynïaid ïa ka mang tyngka jong ki man la u bnai.
Ka jingkiew dor jong ka umphniang ka wanrah ruh ïa ka jingkiew dor jong ki mar ki mata bad ki jingshakri. Namar ba ki trok bad kiwei kiwei ki kali ki kit ïa ki marbam, ki jaiñ bad kiwei kiwei ki jingdonkam, ka jinglut ban pynkynriah ïa kine ki mar ka kiew ryngkat bad ka dor jong ka umphniang. Kumta ka dor jong ki jhur, ki jingbam jhur bad kiwei kiwei ki mar ba donkam ka kiew ha ki ïew ki hat. Kane ka jingkylla kaba mut ka ïarap ïa ka jingkiew dor, kaba pynlong ïa ki longïing ban shem jingeh ban siew ïa ki jingdonkam ba kongsan.
Ki nongrep ruh ki shah ktah namar ba la pyndonkam bha ïa ka diesel na ka bynta ki pump um bad ki mashin rep. Haba ka dor jong ka umphniang ka kiew, ka jinglut jingsep ha ka rep ka riang ka kiew, kaba pynduna ïa ka jingmyntoi jong ki nongrep bad teng teng ka pynbor ïa ki ban pynkiew dor ïa ki mar rep jong ki. Kane ka ktah biang ïa ki nongthied kiba hap ban siew kham bun na ka bynta ki marbam. Nalor kata, ki kam rit kam ria bad ki nongbylla man ka sngi ki ïakynduh jingeh shuh shuh. Ki nongñiah kali, ki nongtrei pynpoi mar, bad ki nongpynïaid kali rit bunsien ki ïohi ba ka jingmyntoi jong ki ka hiar namar ba ki hap ban pynlut kham bun ha ka umphniang katba ka jingïohnong jong ki pat ka dang sah khlem thikna. Na ka bynta kiba bun na ki, wat tang khyndiat eh ka jingkiew dor ka umphniang ka lah ban pynthut ïa ka kamai kajih jong ki.
Ka jingkiew dor jong ka umphniang ka ktah jur ïa ki riew paidbah da kaba pynkiew ïa ka jinglut jingsep ha ka leit ka wan, pynkiew dor ïa ki mar ba kongsan, bad buh jingeh ïa ka mang tyngka jong ki ïing ki sem. Ban pynduna ïa kane ka jingkit, ki Sorkar ki dei ban pyrkhat ïa ki lad kum ka jingpynïaid ïa ka khajna umphniang, ka jingpynbha ïa ki kali paidbah, bad ka jingpynshlur ïa kiwei pat ki lad pynmih bording. Ka jingpynbeit ïa kane ka mat ka long kaba kongsan bha na ka bynta ban ïada ïa ka jinglong jingman ha ka ïoh ka kot jong ki nongshong shnong ba rit paid.
Ngi kynmaw ba dei u Modi uba la pynshlur ïa ki longïing longsem baduk ban pyndonkam noh da ki LPG ban shet jingshet bad ban iehnoh ïa ka umphniang sharak, rnga bad dieng thang. Kiba bun ki la iehnoh shisha. Ki la ïaleit ïeng laiñ ban ïa pynrung kyrteng ban ïoh ïa ki tyndong lyer shet jingshet. Ki la ïoh shisha kumba la kular. Na ka bynta kiba kham don kham em, u Modi u la kyntu ba ki dei ban klet noh ïa ka ‘subsidy’ halor ka LPG khnang ba kane kan ïarap ïa ki baduk kiba kwah pyndonkam LPG. Kiba bun ki nongshong shnong ba kham don kham em, ki la sngap ïa u Modi. Mano ki bym kwah ban ïarap lem ïa ki para briew haba don ka lad?
Ki nongwad bniah ha ka por ilekshon ha ki jylla thor ki la pynbna ba kiba kum kine ki skhim jong u Modi ki pynlong ïa ki nongthep ‘vote’ khamtam eh ki longkmie ba kin jied biang ïa ka BJP sha ka bor synshar. Wat ha ki ilekshon kiba dang shu dep ha ki jylla khamtam ha West Bengal bad Assam, ki nongwad bniah ki la kam ba kiba bun na ki longkmie ki la jied ïa ka BJP na ka daw jong ki skhim ba wanrah u Modi. Ngi ïohi ruh ba kumno ka BJP ha ka por ba ka dang don ha ka Liang Pyrshah ka ju mih madan ban ïakhih ynda la don ka jingpynkiewdor ïa ka umphniang kali lane LPG. U Modi dalade ruh u ju kren pyrshah ïa ka Sorkar UPA ha kato ka por. Hynrei mynta pat?
