Shillong, Jymmang 15
Ki seng saiñ pyrthei ha ka Sngi Thohdieng ki la pynsngew ïa ki mat ba ïadei bad ka jingpynrung kyrteng arsien, ka jingwan buhai shnong be-aiñ, bad ka jinglum jingkheiñ ïa ki jaka khappud hadien ba ki la ïashim bynta ha ka jingïalang ba la pynïaid da u Chief Electoral Officer (CEO) halor ka Special Intensive Revision (SIR) ka ban sa wan jong ka thup kyrteng ki nongthep ‘vote’.
U Vice-President ka United Democratic Party (UDP), Bah Allantry F. Dkhar, u la ong ba ka seng ka la pan jingshai halor katei ka bynta, kaba la pynlong khatduh ha u snem 2005.
“Ngi shu sngewkhia ïa ki kyndon jong ka Special Intensive Revision (SIR). Ïa kane la pynlong naduh u snem 2005. Kata ka dei ka sien kaba khatduh. Kumta u CEO bad ka kynhun jong u ki la sbun ban batai ïa ka jingtreikam baroh kawei ha kaba ïadei bad ka Meghalaya,” la ong u Bah Dkhar hadien ka jingïalang.
U la ong ba ki jingeh ba kongsan jong ka UDP ki long ki nongthep ‘vote’ ha ki jaka ba don jingma.
“Ki jingsngewkhia jong ngi ki long ki jaka khappud bad kumjuh ki katto-katne ki jaka, khamtam ka jingeh jong ka jingpynrung kyrteng arsien ha kylleng ka ‘Inter-state’ bad kumjuh ki nongwan buhai shnong be-aiñ kiba la lah ban shong ban sah ha ki bynta jong ka Jylla jong ngi,” u la ong.
U Bah Dkhar u la bynrap ba ka ophis ilekshon ka la shimkhia ïa kita ki jingeh.
“Hynrei ka kynhun ‘Election Commission’ ka Jylla ka la pyntikna ïa ngi, ki la pyni ïa ngi lyngba ka ‘Presentation’ ba baroh kaba la leh ban pyntikna ban ym don ki nongthep ‘vote’ kiba artatien. Ym don ki nongthep ‘vote’, ki bym dei ki nongshong shnong ka Jylla,” u la ong.
Halor ki sienjam kiba bud jong ka seng, u la ong, “La pynbeit ïa ka por bad ngin peitngor bha kumno ki kam ki ïaid ha kaba ngin thung ïa ki Booth Level Agent (BLA) na la ki jong ki jong ki seng bad nga kyrmen ba kane ka jingtreikam ha Meghalaya kan pynbiang ïa ka jingdawa jong ka Jylla ban don ïa ki nongthep ‘vote’ kiba shisha ha ka thup kyrteng ki nongthep ‘vote’.”
Uwei u nongïalam ka NPP uba la don lang ha katei ka jingïalang u la ong ba ka seng ka la buh jingkylli halor ki kot ki sla kiba lah ban pdiang.
“Ki la batai lyngkot sha ngi shaphang ka SIR bad kaei-kaei kaba donkam, kiei ki kot ki sla kiba donkam,” la ong u nongïalam.
“Ngi la pynpaw katto-katne ki mat na ka seng, ngi sngewkhia halor kine ki kot ki sla jong ki bor synshar shnong kiba la pynshai da u CEO ba kim ju pdiang ïa kito kiba la ai da ki Rangbah Shnong hynrei ki ong kum kiwei pat ki kot ki sla kum ka ST, ki la phah sha Delhi bad ka Sorkar Pdeng lem bad u CEO um pat ïoh jubab eiei,” ong u nongïalam ka NPP.
“Kumba la ïathuh sha ngi, ka long tang kumta,” u la bynrap, da kaba kdew ïa ka jingbym ithuh ïa ki syrnot ba la ai da ki Rangbah Shnong da ka ECI,” u la ong.
