Shillong, Jymmang 15
U Superintendent of Police ka East Khasi Hills District u Bah Vivek Syiem IPS, u la ong ba ki pulit ki dang ap ïa ka sngi ban buh tarik u SDO ka Pynursla Sub-Division ban khlong ïa ka met u samla Trophimos Khongmaw-loh u ba la suba shah bom ïap ha ka shnong Pynter, East Khasi Hills District.
U Bah Vivek haba kren sha ki nongthoh khubor ha ka sngi Thohdieng u la ïathuh ba ka kashari ka la hukum ban khlong ïa ka metïap jong u lanot na ka bynta ban leh ïa ka ‘post mortem’, ha kajuh ka por u la ïathuh ba ki 11 ngut ki briew kiba la suba donkti ki la shim jamin lypa ban lait na ka jingshah kem.
Katkum ka jingïathuh u Bah Vivek, kane ka jingjia ka dei kaba la jia ha ka 7 tarik u Ïaïong 2026 bad la ïoh pdiang ïa ka ejahar na u kpa jong uba la khlad u Bah Netnobiwait Khongsdoh ha ka 5 tarik u Jymmang 2026, ha ka ejahar la kynnoh ba u Rangbah Shnong bad ki Dkhot ka VDP Shnong Pynter ki donkti ha ka ban shoh ban dat ïa u Trophimos Khongmawloh haduh ba un da khlad noh.
U Bah Vivek u la ïathuh ba ïa kane ka jingjia kam shym la don kano-kano ka jingpyntip sha Pynursla Police Station na u rangbah shnong lane ka VDP shnong Pynter, hynrei hadien ba la ïoh ka jingujor ejahar la ‘Register Case’ ïa kane ka jingjia kum ka ‘Murder Case’ lane kum ka mukotduma jingpynïap briew, ha kajuh ka por u la pyntip ba ka jingtohkit ïa kane ka jingjia ka dang ïaid shaphrang.
Haba pynshai haba ïadei ka kam jong ki VDP Shnong, u Bah Vivek u la ong ba ki VDP, ki long kum ki nongïada bad ki long ruh kum ki pulit shnong haba don kino-kino ki kam sniew, kumjuh ruh ki ju ïa treilang bad ka tnad pulit ka Jylla, hynrei ha kane ka kynti ki VDP ki la ïaid lait, ha kaba ki la shim ïa ka aiñ ha ka kti lajong.
“Ki VDP hi ki ai ka jingïatreilang, ki VDP hi ki dei ki pulit Shnong ki ban ai jingïada ban tehlakam ïa ki kam sniew hapoh shnong bad ki dei ban pyntip mar-mar sha ki pulit ïa kino-kino ki jingjia, hynrei ha kane ka jingjia hi kam don kano-kano ka jingpyntip sha ki pulit bad ki la shim ïa ka aiñ ha ki kti jong la jong bad kane ka long be-aiñ” la ong u Bah Vivek.
Haba bynrap u Bah Vivek u la ïathuh ba man ka por ka ju don ka jingïasyllok, ka jingai jinghikai, ka jingïamir jingmut bad ki dkhot ka VDP ba ha kylleng la ka dei ha sor ne ha ki shnong nongkyndong ruh bad nangne shakhmat hi ka tnad pulit kan nangpynjur ban ai ki jinghikai ban pynsngewthuh ba ïa ka aiñ, ym dei ban shim ha ki kti lajong.
