Shillong, Jymmang 17
Ka Umsning People Front (UPF) ka kynhun kaba la mih shakhmat ban ïarap ban synniang lem sha ki longïing kiba duk ba kyrduh bad kiba duna ha ka ïoh ka kot, ha ka sngi Saijaiñ ka la ïoh ban aiti sa kawei pat ka ïing kaba la shna paka sha kawei ka longkmie kaba donkam shisha ïa ka jingïarap.
Ïa kane ka ïing ba la pynbit pynbiang ka UPF la aiti sha ka Kong Jenny Marry Lapang kaba don 4 ngut ki khun, kaba shnong ba sah ha ka Shnong Umsaw Nongkharai Ri-Bhoi District, ha kaba u Dr. David Lyngdoh Chairman ka UPF u la wan ban plie ha ka jingdon ryngkat u Bah Juban June Swer, ka Kong Balakyntiew Umbah President ka Ri-Bhoi Area Welfare Association ryngkat ka jingdonlang u Asst Rangbah Shnong ka Umsaw Nongkharai u Bah Tony Shylla.
Ka Kong Jenny Marry Lapang haba ai jingkren ha ka jingïalang ba lyngkot ha phyllaw katei ka ïing kam lah khlem da jaw ki ummat jingkmen ïa ka jinglehbha ki nongïalam ka UPF ka la pynpaw ka jingsngewnguh ïa ka kynhun kaba la ai jingïarap ïa ka ïing ka sem jong ka.
U Dr. David haba ai jingkren u la ong ba kane ka sngi bad ka khyllipmat ka dei ka khyllipmat jingkmen ïa ka Kong Jenny kaba la ïoh pdiang ïa ka jingkyrkhu ba ha ka ïing ka sem ka jongka. U la ong ba kane ka ïing ba ka kynhun ka pynshna ka long tang ka ïing ba shipor ha kane ka sla pyrthei bad kyntu ruh ban ym klet ban ainguh ïa u nongthaw bad ong ba u briew ha kane ka sla pyrthei u long tang u nongïaid pilgrim.
U Bah Tony, haba ai jingkren u la pynpaw ba na ka liang ka shnong ruh ka la pyrshang ban ïarap ïa katei ka longkmie na ki ophis Sorkar hynrei u la pynpaw ïa ka jingkmen bad ka ai jingïaroh ïa ka kynhun kaba la kloi ban ssngew ban sngap ban pynïoh ïa ka ïing kaba paka sha katei ka longkmie.
