Shillong, Jymmang 17
Da kaba pynlong ïa ka jingsam khusnam kumjuh ki song jingïarap sha ki briew ba kyrpang, ki khyllung ba dang rit bad ki riewtymmen ba la 70 snem tam jong ka Shnong, u Bah Ransom Sutnga haba ai jingkren kum u Kongsan, u la pynsyriem ïa ki nongïalam ka Seng Samla Umsning Patarim (SSUP) ba ki dei shi bynta kita ki ‘Cornelius’ ka shnong ka thaw.
U Bah Ransom u la ai ka jingïaroh ïa ki kam ba bha ba ki khun samla jong ka shnong ba ki la leh bha bad pynshai ïa ka jingmut kaba u ong ba ki long kita ki ‘Cornelius’ ka shnong ka thaw, “U Cornelius u dei rangbah shipai, u briew u ba riewspah, u ba riewblei bad u dei briew u ba don ka mynsiem sngewsynei ïa ki briew kiba donkam ïa ka jingïarap” u la ong.
U la ong ba ki nong Umsning ha kine ki sngi ki la sdang ban kiew, la ka dei ha ka pule puthi, ki kam ïalehkai bad ha ka sap rwai sap tem, kumjuh ki lah ruh ban lehbha, namar kata u la kyntu bad ai mynsiem shuh-shuh ïa ki khun samla ba kin nangpynbha pynjanai ïa ki sap ki phong ba ki don.
Ïa kane ka jingïalang la pynlong mynha ka 13 tarik Jymmang 2026, ha Umsning Auditorium Hall ha kaba la wan ban ïa shimbynta ka Kong N.F Sunn ka District Social Welfare Officer jong ka Ri-Bhoi District lem kiwei ki ophisar ha ryngkat ki khynnah skul.
Haba ai jingkren ka Kong N.F Sunn ka la pynpaw ba ka ophis u DSWO ka ju pynlong ïa ki prokram ai jinghikai ïa ki riewtymmen, ki longkmie bad ki briew ba kyrpang ba kumno kin tip ïa ki hok jongki kumjuh ka ophis ka ju sam ïa ki tiar ki jingdonkam ki jong ki.
Ka la pynkynmaw ba ka tnad ka don ïa ka ‘One Stop Centre’ ha Nongpoh kaba peit kyrpang ïa ki longkmie kiba shah thombor, shah ban beiñ ha la u tnga, hynrei ba kin pyntip khnang ka tnad kan lah ban ai ki jingïasyllok ïa ki arliang.
