Shillong, Jymmang 17
Ki nongshong shnong jong ka Lapangap ha West Jaiñtia Hills ki la rai ban leit rep jubor beit lashai ka sngi Nyngkong sha ka jaka rep jong ki, kaba don markhap bad ka jylla Assam watla ym shah ki pulit Assam bad ki paidbah Karbi.
Haba ïakren bad u Bah Deimonmi Lyngdoh uba dei u Waheh Shnong Lapangap, u la ïathuh ba namar ka Sorkar Jylla ka shu kular thok ïa ki ha kato ka sngi ka 13 tarik Jymmang, 2026 haba ki la leit tur sha Secretariat, kumta ki paidbah ki la rai ba lashai ka sngi Nyngkong ka 18 tarik Jymmang kin mih palat 300 ngut naduh kynthei bad shynrang ha ka por 9:00 baje mynstep ban leit rep namar lada ki ap ïa ka jingkular ka Sorkar, ka aiom ban rep ka la kut.
U la ïathuh ba ki paidbah kin sdang ban rep da kaba leit puh ïa ki hali ha jaka ba ki ju rep kaba mynta la shong ki pulit Assam hynrei kin nym pyndem shuh.
U Bah Deimonmi u la pyntip ba une u bnai Jymmang, ka la dei ka por thung ïa u kba hynrei kim pat ïoh lad tang ban puh ïa ki hali kumta lashai ka sngi jia katba jia kin tur beit sha katei ka lyngkha kaba ki ju rep man ka por.
Shuh shuh u la pynpaw ba u Superintendent of Police bad Deputy Commissioner ka West Jaiñtia Hills ruh kin wan lang lashai haba ki paidbah kin leit rep beit sha lyngkha.
U la ïathuh biang ba ki pulit Battalion ki la don lypa 30 ngut bad mynta ki SF-10 ki la wan poi sa 30 ngut.
U la pynpaw ba ka Sorkar ka la kular ban sdang ban phah leit rep naduh ba ki la leit tur sha Secretariat hynrei haduh mynta ki paidbah kim shym pat ïoh leit rep.
U la ong lada jia ba mih ka huri hura, ki nongshong shnong kin leit phai biang namar kim kwah ban jia kano kano ka jingsngewsih namar haba ki leit rep ki rah tang da u mohkhiew bad ka wait.
