Shillong, Jymmang 17
Ka jingsaphriang ka durkhih shaphang jong ki saw ngut ki shipara ha kawei na ki Youtube Channel, kaba kiba bun ki paidbah ki la ïohi ban peit ïa katei ka durkhih (video) shaphang ka jingim jong ki saw ngut shipara, ka la ktah bad pyndap ïa kiba bun da ka jingisynei.
Ha ka jingïohi ïa kane ka durkhih, ka la pynlong ïa lai tylli ki seng trei mon sngewbha jong ka Ri-Bhoi District kiba kynthup ïa ka Women Organisation Of Ri District (WORD) hapoh ka jingïalam ka President, Kong Maryjune Myrsing bad u nongaibuit, Bah Kyrmenlang Uriah, ka Rural Area Welfare Association (RAWA) hapoh ka jingïalam jong ka Kong Balakyntiew Umbah kum ka President, ka Confederation Of Ri Bhoi People’s (CoRP) hapoh ka jingïalam jong u Bah Pateng Myrsing, ban leit jngoh ha ka sngi Saitjaiñ ïa katei ka longïing, kaba don ha ka Shnong Kananthar kaba don ha ki bynta ba ïakajia khappud ha Block – 2, kaba dang hap hapoh jong ka Mawhati Konstitwensi.
Ha katei jingleit jngoh jong kitei seng trei mon sngewbha, ïa katei ka longïing, ki la leit ban rah lang ha ryngkat ki jingdonkam, kiba long kum ki synñiang ai jingïarap, kiba katei ka longïing ka donkam kiba kynthup naduh ki marbam mardih ha ryngkat ka song pisa, kaba la ai sngewbha na ka liang ka CORP nalor kiwei pat ki lad jingïarap.
Katei ka longïing, kadei kaba duk kaba kyrduh ha ka ïoh ka kot bad kaba shem jingjynjar ha ka jingim ka jong ki, ha kaba ka Kmie jong kitei ki khun da ka jingbym banse, ka la hap ban leit bylla shabar jylla na ka bynta ban bsa ban pyndap ïa ka ïing ka sem.
Ha ka jingbym banse hadien ka jingdep ban ai jinghikai ïa u wei u khun ba la don 8 snem ka rta, kane ka kmie ka la hap ieh ïa la ki khun ki kti jong ka, kaba u khun nyngkong ba 8 snem u hap ban peit bad khmih naduh ka shet ka tiew, ka pynsum pynsait ïa ki para, bad kiwei kiwei ki jingdonkam.
Shuh shuh, ha kane ka jingïaleit ïakynduh ban ïakren, kine ki nongïalam ki la ïoh ban ïakynduh ïa ka kmie kaba dei na ka Kur Rynjah kaba la batai ïa kiba bun ki jingeh ha ka por ba ïakren bad kine ki nongïalam jong kine ka seng.
Na ka liang ki nongïalam ka WORD, ki la ong ïa kane ka longïing bad ïa ka kmie ba kam dei ban sngew marwei, hynrei ban shim ïa ki, kum kiba ha ïing haba don kano-kano ka jingeh bad ban pyntip lang sha ki, khnang ban ïoh ka jingïarap.
Na ka ka liang u President ka CORP, u Bah Pateng Marsing, u la ai mynsiem ïa kane ka longïing bad ban ai khublei ïa kiba la noh jingïarap sha kane ka longïing.
