Shillong, Jymmang 17
Ka Mawlai Presbyterian Higher Secondary School ka la rah ïa ka nam lahduh ha ka ïakop rwai tynrai jong ka Mawlai Inter School kaba la pynlong da ka Lamatti Socio & Cultural Organisation (LS&CO) myn ha ka sngi Saitjaiñ jong ka taïew. Ka skul kaba wan ba ar ka dei ka Sacred Heart Girls Higher Secondary School bad kaba wan ba lai pat ka dei ka MayQueen Secondary School.
Ka Lamatti Socio & Cultural Organisation ka la pynlong ïa kane ka ïakop rwai tynrai jong ki skul Mawlai ban kynmaw burom ïa u Dr. Hamar Babiang Kharlukhi (bam kwai ha dwar U Blei) uba la long uwei na ki rangbah uba la noh synñiang ïa ki jingrwai tynrai bad ïa kine ki prokram la ïarap pisa ruh da ka Sorkar Jylla hapoh jong ka CMYD Scheme jong u snem 2024- 2025 lyngba ka ophis jong ka Deputy Commissioner East Khasi Hills District.
Ha kane ka ïakop rwai tynrai jong ka LS&CO, ka Kong Silbi Passah, Padma Shree ka la long kum ka kongsan bad ki nongbishar ki kynthup ïa u Bah Phyrnai Marbaniang, Bah Herlambok War bad Bah Desmond Rimaki Sunn, ki kaitor ba pawnam bha jong ka Jylla.
Kumjuh ruh ka LS&CO ha ka sngi Thohdieng ka 15 tarik u Jymmang ka la pynlong ruh ïa ka ïakop ïathuh khana puriskam bad ka workshop ïa ki khynnah skul halor ka Bio-engineering, bad ki don haduh 10 tylli ki skul na Mawlai kiba la wan ïashim bynta ha kine ki prokram.
Ha ka ïakop ïathuh khana puriskam ba la ai nam ha ka kyrteng jong u Dr. Pherlok Lamare (bam kwai ha dwar U Blei), u Reward Dohtdong jong ka skul Mawlai Presbyterian u la ïoh ïa ka kyrdan kaba nyngkong, ka Aihunmeiaka Khongwar bad u Saman Nangmer Mukhim na ka skul MayQueen ki la wan ha ka kyrdan kaba ar bad kaba lai.
Ha kane ka ïakop ïathuh khana puriskam u Babu Chosterfield Khongwir, nonghikai Khasi ba la shongthait jong ka St. Edmund’s College bad uba long ruh u kaitor bad myllung ba paw bha jong ka jylla u la long kum u kongsan, u Bah Gavin Conrad Shullai u khun rangbah jong u Dr. Pherlok Lamare kum u symbud Kongsan bad ki nongbishar ki long Dr. Naomi C. Nonglait, Associate Professor ka St. Mary’s College, Bah Joshua Rynjah, Assistant Professor ka St. Mary’s College bad Bah Merlvin Jude Mukhim, u tynshop bad u kaitor ba paw ka Jylla.
Ha ka workshop jong ka Bio-engineering pat la wan ban ai jinghikai ïa ki khynnah skul halor ka jingshna ïa ki jingkieng jri da u Bah Morningstar Khongthaw uwei na ki karikor batbit jong kane ka liang bad ka moderator ne nong pynïaid ïa kane ka workshop dei ka Kong Ibankyntiew Mawrie, Chief Editor ka 4front Media.
Ïa kane ka workshop la ai nam ha ka kyrteng jong u MP ka Shillong Parliamentary uba la khlad noh ha ka 19 tarik u Rymphang, Dr. Ricky AJ Syngkon bad u kongsan ha kane ka workshop u dei u MLA ka Mawlai, Bah Brightstarwell Marbaniang bad symbud kongsan pat dei para jong u Dr. Ricky, Dr. Wandinecia Tariang, nonghikai Economics jong ka skulbah NEHU.
