Shillong, Jymmang 18
Ka Sorkar Meghalaya ka dang ap ïa ka jingai jingbit jong ka Sorkar Kmie na ka bynta ki jingtyrwa kiba bun ban thaw ïa ki ‘border haats’ kiba thymmai bad ki ‘Land Customs Stations’ ha lynter jong ka khappud India-Bangladesh, la ong u Symbud Myntri Rangbah u Bah Sniawbhalang Dhar ha ka sngi Nyngkong.
Haba ïakren bad ki nongthoh khubor, u Bah Sniawbhalang u la ong, “Ki la don bun tylli ki jingtyrwa kiba la phah sha ka Sorkar Kmie ha kaba ïadei bad ka border haats, land custom stations.”
“Ngi dang ap na ka bynta ban ïoh jingbit na ka Sorkar Kmie,” u la ong.
Haba ban jur halor ka jinglong jingman jong kine ki projek hapdeng ki ar tylli ki ri, u la ong, “Naba kane ka dei ka kam kaba ïadei bad kawei pat ka ri, ngi hap ban ïoh ïa ka jingmynjur na baroh arliang namar ngim lah ban plie tang na ka liang jong ka ri India bad ki ruh kim lah satia ban plie tang na ka liang jong ka ri Bangladesh.”
Katkum ka jingpynpaw jong u Symbud Myntri Rangbah, u la ong ba ki jingtyrwa mynta ki dang don hapdeng ka jingshah khmih bniah.
“Ki kam ki jam mynta ki dang don hapdeng ka jingshah khmih bniah ha ka Sorkar Kmie, lehse lyngba ka jingïatreilang bad ka Sorkar Bangladesh,” u la ong.
