Jowai, Jymmang 18
Haduh san tylli ki sngi ki la ïaid hynrei haduh mynta ki jingkular jong ka Sorkar MDA ïa ki nongshong shnong Lapangap kam pat shym la urlong satia, kumta haduh ka 18 tarik Jymmang ki nongshong shnong Lapangap ki dang shah siat da ki jri siat sim ha ki nongshong shnong Karbi ha ka por ba ki dang rep dang riang katba ïa ka jingkhluit hapdeng ki Pnar bad ki Karbi la lah ban tem na ka jingïeng rangbah jong ki pulit Assam kiba khlem shah liang.
Kumba yn shu pynkynmaw hangne, ka Sorkar ha ka 13 tarik Jymmang, haba ki nongshong shnong ka Lapangap kila tur sha Secretariat, ka la ai ïa ka jingkular ban bteng ïa ka kam rep kam riang hapdeng ka jingpahara kaba jur jong ki pulit Meghalaya hynrei phewse ka jingkular jong ka Sorkar kam pat shym la urlong satia.
Ki nongshong shnong Lapangap ki la ïa mih ryntih ban leit rep leit riang sha ki Pynthor jong ki, kiba don markhap bad ka shnong Tahpat, Assam naduh ka por 10.30 mynstep jong ka 18 tarik Jymmang, katba ki nongïalam shnong jong ka Dorbar Shnong Lapangap ki dang ïa leit sha ka jingïalang bad ki nongïalam shnong jong ka Shnong Tahpat ha ka jingdon ryngkat jong ki DC bad SP jong baroh ar liang ki District kata ka West Jaiñtia Hills District bad ka West Karbi Anglong District ha ka jaka sah kaba shi por jong ki pulit Assam kaba don ha ka shnong Lapangap.
Katba ki nongshong shnong ki dang sdang ban puh ïa ki lyngkha pynthor, ki nongshong shnong Tahpat ki la wan shajan ki Pynthor bad siat da ki jri siat sim bad uwei u nongshong shnong Lapangap uba la tip kyrteng u Let Dkhar u la mynsaw malu malu nadien khlieh bad kumta ki nongshong shnong Lapangap ki la hap ban pynsangeh noh ïa ka jingpuh hali namar ka jingshah pynthut ha ki nongshong shnong Tahpat.
Ka la mih ka jingbyrngem byrsit ka jingtim sih tim sang na ka liang ki nongshong shnong Tahpat pyrshah ïa ki nongshong shnong Lapangap ryngkat bad ka jingsiat jri bad ka jingsynreit bitor ba la pait sha ki Hali jong ki nongshong shnong ka Lapangap. Kumta ha ka jingbym banse ki nongshong shnong Lapangap ki la pynphai lang da ki ktien bad ki jri siat pyrshah ïa ki nongshong shnong Tahpat.
Kumba shiteng sngi eiei ka jingïalang ka la wai, u DC bad u SP jong ka West Jaiñtia Hills District bad ki pulit SOT jong ka Meghalaya ki la wanphai da ki kali, tangba ki khlem sangeh satia ban tem ïa katei jingkhluit jinghuri hura bad ki la beit beit sha shnong Lapangap.
Ka jingkhluit hapdeng ki nongshong shnong Tahpat bad Lapangap ka la jur haduh katta katta hynrei da ka jingpoi kloi noh jong ki pulit Assam kumba 150 ngut hapoh ka jingïalam u SP ka West Karbi Anglong District u Dinesh Kumar katei ka jingkhluit kala kham lah ban tem noh.
U SP West Karbi Anglong District u la phah ïa ki pulit jong u ban tehlakam ïa ki nongshong shnong Tahpat bad u khlem pynpaw kano-kano ka jingshah liang ïa ki nongshong shnong Lapangap ne nongshong shnong Tahpat bad dei da ka jingïeng rangbah ki pulit Assam la lah ban tem ïa kino-kino ki jingkulmar kiba kham khraw.
Kumba 500 ngut ki pulit Assam ki la wan poi ha ktem ba shipor jong ki pulit Assam ha Lapangap khnang ban tehlakam ïa kano-kano ka jinghuri hura.
Ha katei ka por ki pulit Meghalaya kynthup ïa ki Special Force -10 kim don ha katei ka jaka ba huri hura, namar baroh ki don ha ka camp ne jaka sah shipor jong ki pulit Meghalaya kaba don ha ka shnong Lapangap.
Ki pulit Meghalaya kumba 20 ngut ki la wanpoi ha katei ka jaka kumba hadien shiteng kynta eiei. Ki nongshong shnong Lapangap ki kylli shaei jah ka shi platoon ki SF-10 bad ar platoon pulit battalion kumba la kular ka Sorkar Jylla namar kim shym la poi satia, bad don ruh ki nongshong shnong kiba ong, ki pulit SOT ki nud ban tem tang ha Shillong katba sha khappud kim nud satia.
Haba ïakren bad u Deputy Commissioner ka West Jaiñtia Hills District, u Abhinav Kumar Singh u la ong, “Ngi la don ka jingïalang hapdeng ki ar shnong ha ka nongrim ban kyntiew ïa ka jingïatreilang bad ka jingsuk jingsaiñ. Ka la long ka jingïalang kaba sngewtynnad shibun. Ki la don mar saw ngut ki nongmihkhmat na ka liang ka shnong Lapangap bad Tahpat.
Ka jingïalang ka la ïaid beit ïaid ryntih. Baroh ar tylli ki shnong ki la ïakren ïa ki mat jong ki, khamtam eh kaba ïadei bad ka rep ka riang bad kiwei pat ki mat ruh kiba la pynpaw na kawei pat ka liang.
U la pyntip ba ha ka jingïalang la rai ban shah ïa ki Tahpat ban leh ïa ka kam rep ha u Lum Pynthor hynrei ym ban thung ïa ki jingthung kiba neh shi junom. Halor kane ka rai u la ïathuh ba kila pyntip sha u Myntri Rangbah ka Jylla.
Haba ïadei bad ki bor pahara u la ong la don ki SF-10 bad ki pulit ban ai jingïada ïa ki nongshong shnong Lapangap.
U Waheh Shnong Lapangap Ma Deimonmi Lyngdoh u la pyntip ba lashai ka sngi ki nongrep ka shnong Lapangap kin sangeh ban leit rep na ka daw ba ki nongrep kim ïohlad satia ban rep da kaba suk kaba sain.
Katba ka Kong Jeny Pyrphet ka la kyrpad rit ïa ka Sorkar India ban tuklar halor kane jingïakajia khnang ba kin ïoh ban rep ban riang noh namar ba ka por ban rep ka la dier.
