Shillong, Jymmang 18
Ka Jylla Meghalaya bad Assam ki dang ïaleh katba lah ban ïatreilang ha ka ban pynbeit ïa ki jingïakajia pud kaba la neh slem bha, khlem da don ka jingpynibor na kano-kano ka liang, ong u nongïalam ka BJP u ba dei ruh u nongthaw aiñ ka Pynthorumkhrah u Bah AL Hek.
Haba kren sha ki nongthoh khubor u la ong, ka Sorkar Meghalaya bad Assam ki dang ïakren ban pynthikna ban pynbeit ïa ka kam ba ïadei bad u pud u sam bad ba ha kawei ka sngi kin sa lah ban weng ïa kine ki jingeh.
U Bah Hek u la ong, ka don ka jingpynbor saiñ pyrthei na Assam bad ka don ka jingpynbor saiñ pyrthei na Meghalaya, “Dei na kata ka daw ba ngi ruh, na ka BJP, na ka NPP ne ka Sorkar, ngim kwah ban buh jingeh ïano-ïano ruh. Ngin ïatreilang da kaba jai-jai.”
U Bah Hek u la kdew ba ka jingker khappud (border fencing), “Ka long kaba donkam na ka bynta ka Meghalaya kumba ka long na ki bynta ka West Bengal, hynrei ka don ka jingïadei bad ka jingïakajia. “Hooid, ha Meghalaya ruh, la donkam. Ngam ong ba ym donkam”, u la ong. “Hynrei hangne ha Meghalaya ki don shibun ki jingkajia pud hapdeng ka Assam bad ka Meghalaya bad bun kiwei pat ki Jylla.”
“Na ka por sha ka por, ngi ha ka Sorkar MDA ngi ïakren ïa kane ka kam khappud” la ong u Bah Hek. “Ngi la ïohi ïa ki komiti khappud jong baroh ki District, lada ïakren ïa ka Block-I bad II, bad ha Ri Bhoi, ki la ïoh la ki jong ki jong ki komiti, kiba la khlieh da ki MLA na ki sengsaiñ pyrthei bapher-bapher ban pynbeit ïa kane ka kam.”
U Bah Hek u la ong, “Ki don shibun ki kynhun ‘survey’ na ka Sorkar India, na ka Sorkar Jylla. Kumta ki don ruh shibun kiei-kiei ban ïakren. ym dei ka kam ba lah ban shu shong ha ka miej, la lah ban pynbeit ïa ki jingeh. Hynrei ngi hap ban leit sha madan bad peit bniah ïa ki jingshisha jong ki jaka. Shisien ba phi la sngewthuh ïa ka jingshisha jong ki jaka, hangta sa lah ban tip kumno ban pynbeit ïa ka jingeh.” u la ong.
