Shillong, Jymmang 18
U Symbud Myntri Rangbah ka Jylla u Bah Sniawbhalang Dhar, hadien katto katne kynta ka jingïakhih ki seng bhalang ba na Ri-lum Jaiñtia ha Shillong, u la khot ïakren ïa ki nongïalam ban ïakren halor ki mat jingdawa jong ki.
Ki dkhot, ki nongïalam jong ka Jaiñtia Students’ Union, ka Jaiñtia National Council lem bad ki nongshong shnong jong ka Daistong ha ka lah sngi u Blei ki la sdang ïa ka jingïakhih na Madan Malki Shillong da ka jingthmu ban tur paidbah sha Secretariat ban dawa pynduh pyndam ïa ka jingpynsngew paidbah (Public Hearing) na ka bynta ka projek tih Mawshun jong ka Shree Cement Ltd, kaba ki la kynnoh ba ka don ka jingpynkheiñ ïa ka Meghalaya Land Transfer Act bad ki jingleh bym hok ha ka Environment Impact Assessment (EIA). U Bah Sambormi Lyngdoh President JNC, haba kren sha ki nongthoh khubor hadien ka jingïalang bad u Symbud Myntri Rangbah u la ong ba ka jingïakren kam long kaba seisoh, namar ba u Symbud Myntri Rangbah, u pyntip ba ka bor kam shong ha u, hynrei ïa kane ka bynta hap ban ïakren bad u Myntri Rangbah ka Jylla u Conrad K Sangma. U la ïathuh ba na ka liang ka jong ki, ki la kyntu ïa ka Sorkar ba ka dei ban pynsangeh shuwa ïa kane ka jingpynsngew paidbah (Public Hearing) ban pynlong ïa ka jingpeit bniah ïa ki kot ki sla, “Kumba ka long mynta kane ka Shree Cement ka ïalam bakla ïa ka Sorkar” la ong u Bah Sambormi.
“Kane ka jaka ba ki thmu ban pynlong kum ka par maw kan ktah ïa ki krem kiba long kum ki jaka jngohkai pyrthei, kumjuh ka ktah ruh ïa ka Wah Liteiñ bad ngi sngewphylla ruh ba ïa ka Lum Syrman ki khot da ka shnong katba ka dei tang u lum, kumjuh ruh mano kiba ai NOC ban pynlong ïa ka Public Hearing” u la ong.
