Shillong, Jymmang 18
Ïa ka met jong u samla Trophimos Khongmawdoh, uba la khlad noh hadien ka jingshah kynnoh thombor ha u Rangbah Shnong ka Pynter bad ki dkhot ka Village Defence Party (VDP), la khlong ha ka Lah Sngi U Blei, bad halor kane, na ka liang u Superintendent of Police (SP) ka East Khasi Hills, Bah Vivek Syiem u la ong ba ka mukotduma mynta ka shong pat sa ha ki jinglap jong ka ‘Post-Mortem’.
“La dei ban khlong ïa ka met ha ka Sngi Thohdieng hynrei namar ka jinglong-jingman ka suiñbneng, la sei noh ïa ka met mynta ka sngi,” ong u Bah Vivek haba kren sha ki nongthoh khubor.
“La leh ïa ka ‘Post-Mortem’ ha katei ka jaka. Ngin dang ap ïa ka kaiphod jong ka ‘Post-Mortem’ ban pyntikna la u dei ba u shah pynïap ne u ïap hi kumto (natural cause),” u la ong.
Ïa ka met jong une uba la khlad noh la tep ha ka 7 tarik u Ïaïong, bad ki ophisar ki la pyntikna ba ka la don ka jingpyut kaba jur bha.
“Hooid, ka met ka la pyut naba ka dei naduh ka 7 tarik u Ïaïong,” la ong u Bah Vivek.
“Hynrei to ngin kyrmen ba ngin ïoh katto-katne ki jingtip shaphang ka daw jong ka jingïap,” u la ong.
Ki pulit ki la kdew ba ka kaiphod jong ka ‘Post-Mortem’ kan rai ïa ka sienjam kaba bud haba ïadei bad ka aiñ. “Hadien kata, ngin sa shim ïa ka rai la hato ngin leit sha ka ïingbishar ban pyndam noh ïa ka jamin bad ban ïaid shakhmat bad ka jingkem,” u la ong.
Haba pyntikna ba ka la don ka jingshah thombor, u Bah Vivek u la ong ba ka jingïadei bad ka jingïap ka dang don ha ka jingtohkit.
“Ka long ka jingshisha ba ka don ka jingshah thombor kaba la jia namar ka jingïakynad kaba la jia ha kata ka ïing, ha kaba ka VDP bad u Rangbah Shnong ki la hap ban tuklar,” u la ong.
“Hynrei ban pyntikna la ka jingshah thombor ka la ïalam sha ka jingïap ne ka dei kaba la pynlong hi dalade, kata kan sa paw shai hadien ba la ïoh ka kaiphod jong ka ‘Post-Mortem’,” u la ong.
Ki nongtohkit ïa mynta ki dang khmih bniah ïa ki sabut lyngba ka dur-khih bad ki nongsakhi.
“Baroh ki bynta jong kane ka jingjia naduh ka dur-khih, ki briew kiba la don hangta, ngi dang pyrshang ban pyntikna kham bniah haba ïadei bad kane ka jingjia bad hadien kata, ngi poi sha ka jingpynkut la hato kine ki briew ki donkti shisha ne em,” ong u Bah Vivek.
Haduh mynta, 11 ngut ki briew ki la ïoh jamin lypa.
“11 ngut ki briew ki la shim jamin lypa, kata ka mut ka jingdonkti jong ki ka don hangta,” u la ong.
Ki pulit ki dang lum jingtip ruh na kito kiba don hajan bad sakhi ha katei ka jaka.
“Kiwei pat ki nongsakhi kiba don hajan ne kiba la don ha katei ka jaka, ngin pyrshang ban pyntikna ïa kata namarba ki kylla long ki sakhi laitluid haba ïadei bad kane ka mukotduma,” la bynrap u Bah Vivek.
Lah ban kdew ba u kpa jong une uba la khlad noh, Bah Netnobiweit Khongsdoh u la ujor ejahar ha ka 5 tarik u Jymmang, da kaba kynnoh ba u khun jong u u la shah thombor ha u Rangbah Shnong bad ki dkhot ka VDP.
