Shillong, Jymmang 18
Ka Hynñiewtrep Youths’ Council (HYC) hapoh ka jingïalam u Samla Enlang Sawian, Education Secretary, ki la leit ban ïakynduh ïa ka Directorate of Higher & Technical Education ka Sorkar Jylla, halor ka jingkynnoh ba la pynkheiñ ïa ka Meghalaya State Reservation Policy ha ka jingthungkam ha Women’s College, Shillong.
Haba kren sha ki lad pathai khubor, u Samla Enlang Sawian u la ong, ka HYC ka la dep pan da ka RTI halor jong ki 22 tylli ki kam ba lait ha katei ka kolej, ba kynthup ïa ka teaching bad non-teaching staff, hynrei lyngba ka RTI la ong “Napdeng ki 22 tylli ki kam ba lait, na Khasi-Jaiñtia bad Garo la rung tang 3 tylli, hynrei na kiba bun pat la ïoh rung da kiwei pat ki jaitbynriew”. U la ong ruh ba kane ka pynpaw ïa ka jingïapher kaba jur ha ka jingthungkam ïa ki teaching bad non-teaching staff ha katei ka kolej.
“Ki 22 tylli ki kam ba lait, ba kynthup ïa ka teaching bad non-teaching, tang 3 tylli kiba ïoh na Khasi-Jaiñtia bad Garo, kiba la shah thungkam, katba kiba bun kiwei pat ki kam, la pyndap da ki briew kiba dei na kiwei pat ki jaitbynriew,” la kynnoh u Samla Enlang.
Haba kylli ïa kadaw halor kane ka jingthungkam thungjam ha katei ka kolej, kaba ki Khasi-Jaiñtia bad Garo ki ïoh tang 3 ngut, u Samla Enlang u la pyntip, ba na ka liang ka tnad kam shym la lah ban pynshai halor kane ka mat ba la buh ka HYC, da kaba aidaw bym don ka Director.
“Ngi dawa ba lada ka tnad ka lap ba kane ka kolej ka la pynkheiñ ïa kata ka Meghalaya State Reservation Policy hapoh kine ki 22 tylli ki kam ba lait, kadei ban wengnoh mardor. Lada jia ba kim leh ei-ei, ka HYC kan sa shim pat da kiwei ki sienjam,” la bynrap u Samla Enlang.
