Shillong, Jymmang 18
Ki kam tuh kam thiem ki dang ïai bteng na kawei ka por sha kawei pat bad ïa kane lah ban sakhi lyngba ki jingjia kiba dang jia ha kine ki khyndiat sngi.
Katkum ka khubor na ki pulit la ong ba u Subrajit Das u la ai ka jingujor ba ha ka 13 tarik mynta u bnai, ha ka por kumba 1 baje mynstep, ki runar bym lah ban ithuh ki la tuh ïa ka arshaka ka jong u, kaba don ïa u registration number ML04-C-9874) na ka thaiñ Polo, Shillong.
Ha ka step jong ka 14 tarik mynta u bnai, ka Kong A Kharkongor ka la ai ka jingujor ba ki runar bym lah ban ithuh, ki la tuh ïa u rnga haduh shiphew byrni na ka dukan jong ka, kaba don ha Laitumkhrah, Shillong.
Ha kawei pat ka khubor u Debabrata Mazumdar na Babupara, Tura (WGH) u la ai ka jingujor ba ha ka 13 tarik mynta u bnai, ha ka por kumba 4 baje janmiet, u la tip ba ki runar bym lah ban ithuh, ki la tuh ïa ka tyndong lyer shet jingshet (LPG cylinder) bad ka pisa kaba long T.400/- eiei.
Ha kawei pat ka khubor, u Sengjrang M Sangma, Junior Engineer (E) u la ai ka jingujor ba ha ka 13 tarik mynta u bnai, ki runar bym lah ban ithuh, ki la tuh ïa ki copper wires bad kiwei ki tiar, kiba shongdor haduh kumba T.6 lak napoh ka Gandhipara LIP House-1 & 2 ha South West Garo Hills.
