Mairang, Jymmang 19
Kum shibynta ban pynsngewthuh paidbah halor ka POCSO Act 2012, NDPS Act, NALSA Scheme 2015 bad Juvenile Justice (Care and protection of Children) Act 2015, ka ophis jong ka District Legal Services Authority (DLSA) West Khasi Hills District ha ka sngi Nyngkong ka la pynlong ïa ka prokram ai jingpynshai ha dorbar hall jong ka shnong Ksehkohmoit ha Eastern West Khasi Hills District.
Ha kane ka prokram la wan ban ai ka jingpynshai paidbah da ki riewshemphang kiba kynthup ïa ka Kong E Myrthong, ALADC, Kong L Nongrem LAC, Bah B Kurbah, Protection Officer ka ophis DCPU, Bah E Mairom na ka ophis DSEO ha ryngkat ka jingïadonlang u Sordar Shnong lem bad ki paidbah nongshong shnong.
Ka Kong E Myrthong haba ai jingkren ha ka jingïalang ka la ong ba ka jingthmu jong kane ka prokram ka long ban batai pynsngewthuh ïa ki paidbah nongshong shnong halor ki kyndon aiñ bad ki hok jong ki paidbah bad ruh ïa ki lad jingïarap ba shu ïoh ei na ka bynta ki longïing ba duk ha kaba ïadei bad ka jingdonkam jong ki lada ki ngat ha kano kano ka apot jong ka jingshah ban beiñ ne jingshah thombor.
Shuh shuh la ïoh ruh ïa ka jingkren na ka Kong L Nongrem kaba la ai ka jingpynshai ha kaba ïadei bad ka aiñ POCSO Act, katba na ka liang u Bah B Kurbah u la ai ka jingpynshai halor ka hok jong ki khyllung khynnah kaba long kaba donkam bha bad ruh halor ki lad jingïarap na ka Sorkar bad la ïoh ruh ka jingkren na ka liang u Sordar shnong bad na ka ophis u DSEO.
