Shillong, Jymmang 19
Uwei u Rangbah nongshong shnong ka Mawtawar, u la mih shakhmat ban pynshai paidbah, haba ïadei bad ka aiñ ‘Building By Law’ kaba la treikam ha ka Jylla ha kine ki snem ba la dep, kaba u la pynpaw ba haduh mynta ki paidbah ki dangsah ha ka umdum haba ïadei bad ka jingtreikam jong kane ka aiñ.
Haba kren bad u Nongsaiñ Hima ha ka sngi Ba-ar jong ka taïew, une u Rangbah u la ong, ba hadien ba wan kane ka aiñ ka la ktah shisha ïa ki paidbah, wat kito ki bym pat shna ïa ki ïing ki sem jong ki ruh, bad haduh mynta ym pat shem la shai haba ïadei bad ka jingpyntrei kam ïa kane ka aiñ ‘Building By Law’.
U la ong ba ka la ktah ïa ka ïoh ka kot jong ki paidbah, khamtam kiba duk ba suk, nalor ba ka pyrthei mynta ka la hiran sha ba palat bad kyrduh, mynta haba la wan sa kane ka aiñ, ka la nangbuh shuh-shuh ki jingeh ïa ki paidbah ka Jylla.
Katkum ka jingïoh jingtip jong u, une u rangbah u la ïathuh “Haba ki briew ki kwah ban shna ïing shna sem, ki hap ban ïoh jingbit shuwa na District Council bad lada ki shna khlem da ïoh jingbit, kin shah pynshitom da kaba pynduh ïa ka jingpynshai (light), pynduh ïa ka um bad kiwei-kiwei de ki jingdonkam ha ïing ha sem”.
“Mynta ïa kane ka aiñ la pyntreikam, tang kumba 10 percent ei-ei, bad lada jia ba la pyntreikam haduh 100 percent, ki paidbah kin sa lynñiar,” u la ong.
Shuh shuh u la ong, haba ka Sorkar ka wanrah ïa kane ka aiñ, kadei ban pynsgewthuh paidbah shuwa, ba la ki paidbah ki pdiang ne-em ïa kane ka aiñ, hynrei mynta kiba bun ki sah ha ka umdum namar kim shym la sngewthuh, kumno la pyntreikam ïa kane ka aiñ.
Nalorkata, u la ïathuh ba kane ka aiñ ‘Building By law’ kam ïapher eiei bad ka aiñ MUDA.
“Katkum ka jingtip jong nga, ba ïa kane ka aiñ la wanrah da ka Sorkar MDA, ha ka por ba ka NPP ka dangsynshar hapoh District Council bad ka jingwanrah ka Sorkar ïa kane ka aiñ ka long beit kumba khñiot beit ïa ki paidbah, kumta kane ka buh jingeh ïa ki paidbah,” la ong u tei u rangbah.
Kumta u la kyrpad ïa ka Sorkar ba lada long kaba lah, kadei ban pynduh noh ïa kane ka aiñ bad ai, ba kan long kumba ka ju long mynshuwa, khnang ba kiba duk ba suk kin ïoh ka jingmyntoi.
