Mawkyrwat, Jymmang 19
Ha kaba ïadei bad jingjia shah shoh ka longkmie bad u khunlung uba dang shisnem khatwei bnai ha Mawtaïem, Nongnah ha South West Khasi Hills District kaba la jia ha ka 12 tarik u Jymmang, 2026, na ka liang ka Kong Tyngshaiñlin Paliar, ka kmie jong ka khynnah samla kaba shah kynnoh donkti ban shoh ïa ka kmie bad u khunlung ha katei ka sngi, ka la wan ban pynshai ha kaba ïadei bad katei ka jingjia.
Katkum ka jingïathuh ka Kong Tyngshainlin Paliar bad ka Kong Sngewbhalin Paliar, ki la ïathuh ba ka jingkynnoh jong ka Kong Rismilin Paliar halor ka jingshah shoh u khunlung bad ka kmie ha ki arngut ki khynnah samla kynthei ka dei kaba shu thok shu lamler.
Shuh shuh ki la pynshai ruh ba ha katei ka sngi ka khun jong ka Kong Tyngshaiñlin Paliar kaba kyrteng ka Sprai-linda Paliar, 17 snem kaba don jingduna ha ka bor pyrkhat katba ka dang leit tong um na wah, ka Banjoplin Paliar kaba bah ïa u khunlung ka la patan ïa ka na u shñiuh bad ksih na ryndang bad ka la dait ruh ïa ka kti jong ka haduh ba ka la mynsaw.
Ka kmie ka la ïathuh ruh ba ka Sprailinda Paliar ha ka jingpang bym don pyrthei shuh na ka jingshah dait ka kti, ka la kynjat ïa ka Banjoplin Paliar bad ka la ur ha madan bad ïoh ban ruh ïa u khunlung uba ka bah bad ïa ka Sprailinda Paliar la pynkit noh wut wut sha Civil Hospital Mawkyrwat ha katei kajuh ka sngi namar ka jingshitom.
Ha kaba ïadei bad ka jingkynnoh shah shoh u khunlung, ka Kong Sngewbhalin Paliar kaba dei ka kmienah jong kitei baroh arliang, ka la kyntait ïa katei ka jingkynnoh bad ka kynthoh kylla ba dei ka Banjoplin Paliar ka longkmie ba bah khunlung kaba la shoh ïa ka khun u Myntri shnong haduh ban da mynsaw.
Ka la kam ruh ba utei u khyllung u khlem da shitom kumba la ïathuh da ka Kong Rismilin Paliar bad ka don ruh ki sakhi kaba ka la ringdur hadien arsngi ïa u khunlung ba ki leit ban ïa pynbeit ïa katei ka jingjia ha ïing jong ka Kong Rismilin ba utei u khunlung u dang pan ja na ka kmie-ieid bad ka la ïathuh ruh ba dei hadien ar sngi jong katei ka jingïakajia, kata, ha ka 14 tarik ba ki la leit pynkit ïa u khunlung sha hospital.
Ha kaba ïadei bad kane ka jingjia, ka Kong Tyngshainlin Paliar ka kmie jong ka Sprailinda Paliar ka la pynpaw ïa ka jingsngewkhia kaba jur ïa kine ki jingjia namar ki dang ïadei shi ïing shisem shi hynmen shipara bad ka la kynnoh ruh ba dei ka Kong Rismilin Paliar kaba thaw ïa kine ki huri hura wat ban thad sha ki lad pathai khubor, watla na ka liang kiba haïing hasem ki kwah shwa ban ïa pynbeit haïing ïa kane ka kam.
Ki la kynnoh ruh ba ka Kong Rismilin Paliar ka dei ka briew kaba die kyiad ha shnong bad pynmih bun ki jingkulmar man ka por ki bym ïadei dur ha ka imlang sahlang.
Ha kaba ïadei bad kane ka jingjia baroh arliang ha ka 16 tarik u Jymmang, 2026 ki la leit ban ujor da ka ejahar ha thanad Mawkyrwat.
