Shillong, Nailur 04
U kyrtong MP shiteng samoi jong ka National People’s Party (NPP) u Dr. DRL Nonglait ha ka sngi Thohdieng u la ong ba um ju don jingthmu ban ïakhun ilekshon ha ki 20 snem tam ba u la shakri kum u nonghikai ha ka skulbah NEHU, hynrei u la shim ïa ka rai ban ïakhun ilekshon mynta ka dei namar ba ka Jylla bad ka jaidbynriew ka donkam ïa ka jingtrei jong u.
Ïa kane u la pynpaw haba ai jingkren ha ka jingïalang paidbah ba la long ha Mawryngkneng, u Dr. Nonglait u la pynkynmaw ïa ka jingïaid lynti jong u ha ka jingduk bad na ka jingïohkam jong u kum u Bill Clerk ha ka MeSEB, kaba don hajan Secretariat kaba pynlah ïa u ban pynpoi haduh ka kyrdan ban long u nonghikai bad u ophisar jong ka skulbah NEHU.
“Nga la im ha ka jinglong duk kum u nongrep ba na ki thaiñ nongkyndong” u la ong bad u la ïathuh ba ka shnong jong u ka Lawbyrtun kaba hap hapoh ka Hima Mawiaweng ka dei kaba dang bat dang ksoh ïa ki rukom tynrai ki riti dustur mynbarim jong ka Raid Nonglait.
U Dr. Nonglait u la ong ba kumba 80% na ki paidbah jong ka thaiñ ki dei ki nongrep bad namar ba ma u ruh u wan na ka juh ka tynrai, u sngew ba u don ka jingïadei kaba ïajan bha bad ki paidbah jong katei ka thaiñ.
Haba pynkynmaw ïa ki sienjam ba la shim haba ïadei ka pule puthi, u Dr. Nonglait u la ong ba dei lyngba ka jingai jingmut jong u ba ka Riwar College ka la leit ban ïakren ïa u Symbud Myntri Rangbah ka Jylla u Bah Prestone Tynsong ban pynïoh ïa ka jingithuh napoh ka skulbah NEHU kaba la pynsuk shibun ïa ki paidbah ka thaiñ.
U la ai jingïaroh ïa u Symbud Myntri Rangbah Sniawbhalang Dhar, u ba la peit ïa kane ka Constituency, namar ba u la ïarap ban pynlong ïa ka Nongtalang, ka Thomas Jones, ka Shangpung bad Khliehriat Colleges kiba pynmyntoi ïa ki paidbah, watla ka NPP kam pat don MLA ha kine ki thaiñ. “Kane ka la pynlong ïa nga ban kwah ban ïatreilang bad ka Sorkar” u la ong.
U Dr. Nonglait u la ong ruh haba ïadei ki jingeh ki jingïakhih ki nonghikai ha surok lyngba ka Education Policy kaba u ruh u la don bynta ban pynkreh, u la ong ba ka ‘New Pay Structure’ ka la wanrah ïa ka jingsiew kaba kham biang ïa ki nonghikai kiba la ïakhih na bynta ka hok jong ki, hynrei u la ong ba ïa ka tulop jong ki nonghikai ba la kham rangbah bad ka jingïarap ïa ki skul ba dang shu ithuh thymmai ka dang donkam ban shimkhia.
U la ong kum u khlieh jong ka NEHU’s College Development Council u la ïohi ïa ka jingdawa kaba la slem bha ban ïoh ïa ka Medical College. Hadien bun bun snem, kane ka jingdawa ka la urlong. “Naduh ba ngi ïoh ïa ka Jylla, ngim pat ju don Medical College. Ki samla pule ki la ïoh jingmyntoi na NEIGRIHMS hapoh NEHU, hynrei ha u snem ba la dep ki la ïoh jingbit ban sdang ïa ka Shillong Medical College” u la ong.
