Shillong, Nailur 04
Ka National Hynñiewtrep People Federation (NHPF) ha ka Sngi Thohdieng ka la ujor da ka ejahar (FIR) pyrshah ïa u Sanjay Sharma ha Jhalupara Police Out-post halor ki nongrim jingkynnoh ba u la thoh ha ki rynsan ‘Social Media’ ïa ki jingthoh ba ktah mat-ïong ïa ki Khristan.
Haba ïakren sha ki nongthoh khubor u President ka NHPF u Bah Nowel Kurbah u la ong ba ka jingthoh u Sanjay ka ktah ïa ki Khristan bad kan lam sha ka jingïakynad sngewpher niam.
Shuh-shuh u la ïathuh ba u Sanjay u dei uba pynïaid ïa ka Cyber Cafe ha Mawbah, katba u dei u ba shong ba sah ha Sunny Hills bad kane ka jingthoh jong u ha ka ‘Facebook Account’ ka ktah bad ka pynsngewsih jur ïa kiba dei na ka niam Khristan.
U Bah Nowel u la ïathuh ba ha ka jingïakren jong ki, u Sanjay Sharma u la kubur ba u la kren bad buh ïa ki jingthoh ha ki rynsan Social Media.
Nalor kata u la ïathuh, haba ïadei kane ka jingjia ka NHPF ka la buh da ka ejahar ha Jhalupara Police Outpost bad ka kyrpad ïa ki bor pulit ba kin pynlong ka jingtohkit bad ban pynshitom ïa utei u briew katkum ki kyndon ka aiñ.
