Shillong, Nailur 04
U President ka NPP Mowkaiaw Block, West Jaiñtia Hills District Bah Heirtami Suting u la pynpaw ba u pdiang beit lada ki nongïalam kiba halor jong ka NPP kin pdiang lada rung NPP u Bah Nujorki Sungoh uba dei u MLA ka UDP na Mowkaiaw constituency.
Haba ïakren lyngba ka phone bad u Bah Heirtami Suting u la ïathuh ba haduh mynta um pat don jingtip eiei shaphang ka jingthmu ban rung NPP u Bah Nujorki Sungoh hynrei u la shu bna sharum shaneng haba ki riew paidbah jong ka constituency ki ïakren hynrei um pat lah pat ban pynshisha.
U la ïathuh ba lada jia ba u Bah Nujorki u rung sha ka NPP kumba ïakren ki paidbah, un pdiang beit lada la dep pynbeit bad ki nongkitkam kiba halor.
U la ong ba lada wan rung u Bah Nujorki, kan long kaba kmen shisha namar ka Mowkaiaw ka donkam ïa ka roi ka par hapoh ka constituency na bynta ka jingbit jingbiang jong ki paidbah.
U la ong ba haduh mynta ki nongïalam jong ka NPP Meghalaya State Unit kim pat pyntip eiei hynrei lada ki la ïapynbeit ki nongïalam ïa ka jingrung NPP u Bah Nujorki u pdiang beit.
Kumban shu pynkynmaw kane ka jingbuddien u nonglum khubor na u President ka NPP Mowkaiaw constituency ka dei hadien ba ki khubor na Jylla bad jong ka ri ki la pynmih ba khyndai ngut ki MLA ka UDP kin rung noh sha ka BJP bad ar ngut kata u Bah Nujorki Sungoh uba la jop arsien na ka UDP bad u Bah Renikton Lyngdoh na Mawkyrwat kin rung sha ka NPP, kaba sah mynta ha ka UDP sa tang u Bah Metbah Lyngdoh u MLA ka Mairang constituency uba dei ruh u President ka UDP.
Kine ki khyndai ngut ki MLA ka UDP kiba lah ban rung sha ka BJP ki long u Bah Paul Lyngdoh na West Shillong, Bah Lahkmen Rymbui na Amlarem, Bah Mayralborn Syiem na Nongpoh, Bah Synsharkupar Lyngdoh Thabah na Sohiong, Bah Kyrmen Shylla na Khliehriat, Bah Pius Marwein na Ranikor, Balajied Synrem na Shella, Bah Olan Sing Suin na Mawsynram, Bah Matthew Beyonstar Kurbah na Mawphlang.
