Shillong, Nailur 04
Ka Khasi National Dorbar ha ka 04 tarik u Nailur (August), 2026, ka la kynjoh sha u mawmer ba 103 snem ha ka ban ai ka jingshakri jong ka ïa ki paidbah u hynñiewtrep, naduh ba la seng ïa ka, ha u snem 1923.
Ha kane ka sngi, u Pa’iem Laborious Manik Syiem, u la kyntiew ïa ka lama jong ka Khasi National Dorbar, kum ka dak ban eh rngiew bad ban kynmaw burom ïa kane ka sngi dap 103 snem ha ka jingshakri jong ka.
La ïadon lang ha kane ka sngi, naduh ki nongïalam shnong Mawkhar, ki longkmie ki longkpa, ki samla bad haduh ki hep ki barit, ban pynshngaiñ ïa kane ka lyngkhuh sngi dap ba 103 snem ka dorbar.
Haba kren sha ki lad pathai khubor u President ka Khasi National Dorbar, kata u Pa’iem Laborious Manik Syiem u la ong, haba dang kynmaw ïa kane ka sngi ka rngiew ka bishi ka jaidbynriew kan dangneh dangsan pateng la pateng.
U la ong ba ha kato ka por ba la seng ïa ka Khasi National Dorbar, ka dang dei ka Khasi Nation, na kata ka daw sa ai da ka kyrteng Khasi National Dorbar namar la seng ïa ka, ha ka por ba ka Jylla ka dang don ha ka semi independence state.
“La wanrah ïa ka Khasi National Dorbar ha ka nongrim ban tehsong lang ïa ki Syiem ki Lyngdoh, ki Basan bad ki Bakhraw Batri bapher-bapher, ban tehsong ïa ka jaidbynriew,” u la ong.
Shuh shuh u la ong ba ka jingïakren ba nyngkong ha katei ka dorbar ka long, ban kyntu ïa ki samla ban ïabeh sha ki jingpule, hynrei ban kynmaw pat ba ym dei ban ïabeh sha ki kam Sorkar, hynrei ha ki kam rep kam riang bad kiwei pat ki kam kiba wanrah ïa ka roi ka par ïa ka ri baroh kawei.
“La wanrah ïa ka Khasi National Dorbar ha ka bynta ban ïateh song lang. Ka jingpynher ïa ka lama mynta ka sngi, kadei ban kynmaw ïa ka snem naduh ba la seng ïa ka bad ban phaidien ban peit, hangno ngi btuid bad hangno ngi skhem, bad ngin peit ba hangno kita ki jaka ba ki btuid ba ngin pynskhem ym ban ïa kdew kti bad ym ban ïa kynnoh,” la bynrap u Pa’iem.
