Shillong, Jymmang 19
U Myntri ka tnad ka koit ka khiah ka Jylla, Bah Wailadmiki Shylla ha ka Sngi Ba-ar u la dawa na ka Sorkar Pdeng ban wanrah da ka aiñ kaba tyngeh ban ïada na ki jingbym biang haba ïadei bad ka National Eligibility-cum-Entrance Test (NEET-UG) bad kiwei-kiwei ki eksamin ha ka ri, da kaba ong ba ki jingbakla ba na ka por sha ka por jong ka National Testing Agency (NTA) ka wanrah ïa ka jingartatien hapdeng ki samla pule bad ki kmie ki kpa jong ki.
“Kane kam dei tang ha Meghalaya, ka ktah ruh ïa kiwei ki Jylla. Ka long kaba sngewsih haduh katta-katta namar ngim ju khmih lynti satia ïa kane,” la ong u Bah Wailad haba kren sha ki nongthoh khubor.
U Myntri ha kajuh ka por, u la pynrem ïa ki jingjia ba dang shen kiba ïadei bad ki eksamin ba la pynlong da ka NTA bad ban khia ïa ka Sorkar Pdeng na bynta ka jingkitkhlieh.
“Namarba ïa kane la leh da ka National Testing Agency (NTA), nga pynrem shisha ïa kane. Ngan kyntu ïa ka Sorkar Pdeng ban leh eiei,” u la ong.
U la kdew ruh ïa ki jingkular ba la ai da u Myntri ka tnad pule-puthi ka Sorkar Pdeng.
“Khyndiat sngi mynshuwa, u Myntri ka tnad pule-puthi ka Sorkar Pdeng u la mih shakhmat bad ka kyrwoh ba nangne shakhmat, yn leh da kaba tyngeh bad kin sa shimkhia ba kum kine ki jait kam kin ym jia shuh nangne shakhmat,” la ong u Bah Wailad.
Haba kyrpad na ka bynta ki lad ki lynti kiba skhem, u la bynrap, “Ka Sorkar Pdeng ka hap ban leh eiei khnang ban ïoh biang ïa ka jingshaniah jong ki paidbah ka Jylla namar kane ka la ju jia teng wat ha ki por ba la dep ruh. Haba jia kum kine ki jait jingjia, ka pynduh mynsiem shisha ïa ki samla pule kiba la ïakhun ïa ka eksamin bad ïa ki kmie ki kpa kumjuh.”
“Nga kwah ban ïohi ba ka Sorkar Pdeng kan wanrah ïa ki aiñ kiba pyrkhing khnang ban ïoh biang ïa ka jingshaniah jong ki samla pule bad ki kmie ki kpa,” u la ong.
U Bah Wailad u la kyrpad ruh ïa ki samla pule ba kim dei ban duh jingkyrmen hadien kine ki jingshah pynthut.
“Kaba sngewsih ka long ba kane kam dei ka sien kaba nyngkong ban jia. Ngan kyntu ïa ki samla pule ba kim dei ban duh mynsiem,” u la ong.
“La shimkhia mardor bad nga tharai ba la dep ban pynbna ïa ki tarik ba thymmai,” u la ong.
U la batai ïa kane ka eksamin kaba hap ban thoh biang kum ka jingplie lad kaba ar.
“Nga kyntu ïa ki ba kim dei ban duh mynsiem. Kane ka dei ka kabu kaba ar kaba phi ïoh, trei shitom bad ngi don lang ha syndah bad phi ha kane ka bynta,” la ong u Myntri.
“Ka Sorkar Pdeng ka dei ban wanrah da ki aiñ kiba tyngeh khnang ban ïoh biang ïa ka jingshaniah jong ki samla pule. Kine kiei-kiei baroh kin ïai jia beit ha ka jingim jong ngi tangba phim dei ban duh mynsiem. Phi dei ban don beit ka thong bad ban trei shitom beit,” u la ong.
Katkum ka jingong u Bah Wailad, ki don bun ngut ki kyrtong na Meghalaya kiba la shah ktah.
“Ki don shibun bha na ka Jylla,” u la ong.
Shuh shuh u Myntri u la ong ba ïa ka tarik thymmai na ka bynta ka eksamin NEET-UG la dep pynbeit.
“Ïa ka tarik bathymmai la dep ban buh, lada ngam bakla, ka dei ha ka 21 tarik u Jylliew,” u la ong.
