Shillong, Jymmang 19
U President ka Voice of the People Party (VPP) Bah Ardent M Basaiawmoit u la ong ba ka thong kaba la buh ha u snem 2028 ka long ba ki paidbah kin pynjop donburom ïa ka VPP na Nartiang Konstitwensi.
Ïa kane u Bah Ardent u la kren ha ka jingïalang paidbah kaba la pynlong ha ïew Pynsing, Wahiajer ha Nartiang Konstitwensi ha ka sngi Ba-ar.
U Bah Ardent u la ong ba ha Meghalaya ki don ar tylli ki seng saiñpyrthei, kawei ka NPP bad kawei ka VPP, ha kaba ka NPP ka la ong ba kan dang bat ïa ka bor synshar katba ka VPP ka ong ba kan sa knieh noh ïa ka bor synshar.
“Balei ka NPP ka sngew skhem ban bat ïa ka bor synshar namar ka don ha ka Sorkar, ka don ha ka bor. Ka lah ban ai skhim katba ka mon, ban ai kontrak katba mon, ban byrngem briew ba ka don ha ka bor. Ka VPP ka sngew skhem namar ka shaniah ha U Blei ban shakri bad kyrmen ha ka jingstad bad ka jingieid jong u paidbah,” la ong u Bah Ardent.
Shuh shuh u Bah Ardent u la ong, “Lah ka bor pisa ne lah ka bor jong ka jingieid. Ngin jop bad ngin nym artatien satia.”
Ha kajuh ka por pat u Bah Ardent u la pyntip sha ki paidbah ba “Lada ngam bakla, u MLA ka Nartiang u khot sngewbha ïa u Bah Ardent ban ïakhun na Nartiang, lada u khot sngewbha nga kloi ban wan ban ïakhun, ka ban long ka jingïakhun hapdeng uba duk bad uba riewspah. Nga sngew shngaiñ ba ka jingieid kan jop bad ngin buh ka jingduwai na ka bynta ka ri bad ka jaidbynriew bad haba ngi buh jingduwai ym na ka bynta ïalade hynrei na ka bynta ka pateng ka ban wan ban ai jingkyrmen ïa ki longdien mandien.”
