Nongpoh, Jymmang 19
Kumba long lem ha baroh shi tyllup ka ri, ïa ka prokram ‘Jan Bhagidaari – Sabse Door, Sabse Pehle’ la pyllait paidbah ruh ha Ri Bhoi District ha ka sngi Nyngkong da u Raja Brahma, Additional Deputy Commissioner ka Ri Bhoi, uba dei ruh ha kajuh ka por kum u Director ka SRES-DID Ri Bhoi ha ka jingïalang kaba la pynlong ha Conference Hall jong ka DRDA, Nongpoh.
Ka jingthmu ba kyrpang jong kane ka prokram ka long ban pynthikna ba ki lad jingïarap bad ki skhim pynroi bapher bapher jong ka Sorkar kin poi shaduh kiba kut jong ki shnong kyndong hapoh ka district.
Ha katei ka sngi pyllait paidbah ïa ka prokram ‘Jan Bhagidaari – Sabse Door, Sabse Pehle’ la wan ban ïadon bynta lang da ki heh ophisar kiba dei peit ïa ki tnad treikam Sorkar bapher-bapher kiba don ha ka district.
Lyngba kane ka sngi, ki heh ophisar kila pynpaw ïa ka jingthmu jong katei ka prokram bad ka jingteh kular jong ka Sorkar ban poi sha ki jaka kiba kyndong eh jong ka imlang ka sahlang, khamtam ha ki jaka ba shong ba sah ki paidbah riewlum bad kiwei de ki nongshong shnong da kaba pyntreikam bha ïa ki skhim pynroi bad prokram bapher-bapher jong ka Sorkar.
Kane ka prokram ka don ruh ïa ka thong ban pynkhlaiñ ïa ka jingïashimbynta lang jong ki paidbah ban pynthikna ba kito kiba dei hok ban ïoh, kin ïoh ïa ki lad jingïarap bad jingmyntoi na ka Sorkar ha ka por kaba biang.
Ha katei ka sngi, la ban jur ruh ïa ka jingdonkam ban don ïa ka jingïatreilang hapdeng ki tnad treikam Sorkar ki bapher-bapher ban pynbeit ryntih na ka bynta ban ai ïa ki jingdonkam jong ki paidbah ha kaba la bthah ïa baroh ki tnad treikam Sorkar ba ki dei ban pynthikna ba baroh ki nongshong shnong kiba dei hok, kin ïoh ïa ka jingmyntoi khlem da ieh wat tang uwei ruh bad ruh ban ai ki lad jingïarap halor ka jingeh kaba ki paidbah nongshong shnong ki ïakynduh.
Shuh shuh, la ban jur ruh halor ka jingdonkam ban ai jingtip, jinghikai bad jingïakren sngewthuh lane pynbna paidbah kaba la tip ruh kum kata ka Information, Education and Communication (IEC) ha kaba ïadei bad kane ka prokram na ka bynta ki paidbah ha kaba ïadei bad kiba bun ki skhim pynroi bad ki lad jingïarap kiba wan lyngba ka Sorkar.
La pynkut ïa kane ka prokram lyngba ka jingkular jong baroh ki tnad treikam Sorkar ban ïatreilang ryngkat ryngkat ban pynlong ïa ka jingpyntreikam ïa kane ka prokram kaba jop bad kaba ïaid beit ïaid ryntih bad ruh ban pynthikna ba yn nym don uwei u nongshong shnong u ban shah ieh shadien ban ïoh ïa ki jingmyntoi na ka Sorkar kiba u dei hok ban ïoh.
