Shillong, Jymmang 19
Ka jingbteng ka thma hapdeng ka United State of America bad Iran ka la buh jingeh ïa ki ri ka pyrthei namar ka umphniang kali naduh ka petrol bad diesel ka la kiew lang.
Ka jingkiew dor jong ka umphniang ka la sdang naduh sngi Sait-jaiñ haba ka Sorkar India ka la pynkiew ar tyngka sanphew naia hynrei mynta ka sngi ha ka por mynstep ka la pynkiew sa 70 naia.
Kumta ka petrol ka la poi 99.63 tyngka shi litar bad ka diesel ka la poi 90.94 tyngka shi litar.
Haba ïoh ban ïakren bad u Bah Samborlang Diengdoh, uwei na ki trai ka petrol pump ha Shillong u la ïathuh ba ka jingkiew dor ka umphniang rew ba la wanrah na ri Middle East ka dei na ka jingïakhun thma ka America bad Iran.
U la ong ba lada kane ka thma kan sangeh noh, ka dor ka lah ban hiar hynrei lada ka thma kam kut, kan dang lah ban nang kiew bad kan ktah ïa ki ri ka pyrthei.
U la ïathuh ba ka umphniang kali kam don jingduna hynrei ka shu kiew ka dor hynrei ki paidbah kiba ju thep umphniang kali kim dei ban tieng hynrei ki dei pat ban kunai bad pyndonkam ïa ki kali tang ha ka por ba donkam ïoh lehse kan nang kiew nangne shakhmat.
Shuh shuh u la ong ba namar ka jingkiew dor ka umphniang kum ka diesel, ki marbam ki lah ban kiew namar ka Jylla ka shaniah ha ki trok ban wan kit mar namar ki trok haba ki ïaid ki hap thep da ka diesel.
U la ong ba ïa u khaw ban sam ïa kiba duk, la wan kit na Punjab bad Haryana, ka dohkha la wan kit na Andhra Pradesh, ki jhur la wan kit na Assam bad Bihar.
Kumta u la kyntu ïa ki paidbah ba ki dei ban ïaid da ka kjat haba ki leit donkam ha Shillong ne ha kino-kino ki jaka khnang ban nym pynlutkai ïa ka umphniang kali kum ka petrol bad diesel.
