Shillong, Jymmang 19
Ki pulit ka Pasteur Beat House ha ka step jong ka 19 tarik u Jymmang 2026, ki la ïoh jingtip ïa ka jingdon ka wei ka metïap ha Quarter jong ka tnad Forest, kaba don ha Polo Hills, mar pyrshah ka Buddhist Temple.
Na ka liang ki pulit hadien ba ki la ïoh jingtip halor kane, ki la hiar bran-bran sha katei ka jaka ban peit bad ki la lap, ba kane ka metïap, kadei ka jong u wei u shynrang briew, ha kaba kane ka met ka la pyut bad boi ksaiñ.
Ki pulit ka Pasteur Beat House, ki la pyntip noh sha ki pulit Crime Scene Unit halor kane ka jingjia, hadien katto katne por, ki pulit ki la shimti bad rah noh ïa kane ka met ban leh ïa kaba donkam.
Haba kren sha ki nongthoh khubor, ki nongïalam shnong Golflink ki la ong ba ka jingieh khlem nongpeit ïa ki Quarter jong ki tnad Sorkar, ka wanrah ïa ka jingeh ïa ki shnong ki thaw, khamtam ban peit ïa ka shongsuk shongsaiñ jong ki nongshong shnong.
Ki nongïalam ka Dorbar Shnong Golflink bad ka dong Polo Hills ha ryngkat ki Seng Samla ka Shnong Golflink, ki la pynpaw ïa ka jingsngewdiaw ïa ka jingbym shimkhia jong ka tnad Forest, ban pynpra ïa ki ïing jong ki, kiba la shu ieh khlem shong briew ha Polo Hills, pyrshah ka Buddhist temple.
U Bah Wallambok Nongkynrih Assistant General Secretary dorbar shnong Golflink u la ong “Ka jingbymshim khia jong ki bor ba halor ban pynpra ïa kine ki ïingjah ka buh jingeh ïa ki. Na ka por sha ka por ki la phah da ka jingthoh, ban pynpra noh ïa kine ki ïing namar ki buh jingma ïa ki nongshong shnong, da ka jingwan sah ki briew ki bym lah ban ithuh.
U la ong ruh ba haduh mynta, da ki snem ka la shim por hynrei kim shym la ïohi dak ei-ei ba ka tnad Forest kan shim khia.
Na la liang u Samla Mordekai S Kharpuri, President Seng Samla Centre Body Golflink Pyllun u la ong ba lada ka tnad kam leh ei-ei, ka shnong kan shim ïa ki sienjam kiba tyngeh bad kin shimti noh da ka shnong ïa kane ka jaka bad pynpra ïa kine ki ïing, kiba la shu ieh khlem don ba peit ba khmih.
U la bynrap da kaba ong “Da ka jingbym shimkhia mynta hangne, la lap ïa ka metïap, bad kum kine ki jingjia ki buh jingeh ïa ka shnong ka thaw”.
Ha kane ka sngi la don lang ruh da u Rangbah Dong ka Polo Hills, u Bah Khrawbok Nongkynrih, u Samla Dion Sohbha, President Seng Samla Polo Hills bad kiwei ki nongïalam shnong.
