Shillong, Jymmang 19
Ka Dr. H. Gordon Roberts Hospital, Shillong ha ka 19 tarik u Jymmang 2026, ka la pynlong ïa ka prokram World Human Milk Donation Day, da kaba pynkup burom ïa ki longkmie kiba la ai jingïarap ban ai dud buiñ ïa ki khyllung.
Ha katei ka sngi la ïadon lang u Additional Chief Secretary, Health & Family Welfare Department ka Sorkar Jylla, u Sampath Kumar, uba long kum u Kongsan ha ryngkat ka jingïadonlang, u Medical Superintendent, u Dr Kenneth R L. Nongpiur, ki doktor, ki nos bad kiwei-kiwei ki nongshah khot sngewbha, kiba la poi ha katei ka prokram.
Ban pynitynnad shuh shuh ïa ka prokram, na ka liang ki nos katei ka jaka sumar, ki la ai da ka jingrwai ai khublei sha ki longkmie, kiba la kloi ban ai ka jingïarap ban ai buiñ sha ki khyllung ba dangkha.
Lah ban kdew, ba ka jingïarap ai dud buiñ ki longkmie sha ki khyllung, kadei ba don ki longkmie ki bym shym la lah ban ai buiñ hi dalade haba la kha ïa ki khyllung, ki don ki longkmie kiba ïarap ban ai dud, khnang ba ki khyllung ba dangkha kin ïoh ka met kaba koit ba khiah.
Ïa kane ka dud ba la noh synñiang da ki longkmie, ka Hospital ka ai sha kito ki khyllung kiba rit kilo bha bad ban ai ruh sha ki khyllung kiba shitom jur ha ka por ba dangkha, ki khyllung ki bym lah ban dih da ka dud ka kmie lajong, ban ai ruh sha ki khyllung ba ha ka por ba dangkha, ki kmie ki shitom jur ba kim lah ban ai dud ïa ki khun bad sha ki kmie kiba la khlad noh.
Haba ai jingkren ha katei ka prokram ,u Sampath Kumar, Additional Chief Secretary, Health & Family Welfare Department ka Sorkar Jylla, u la pynshai ha kaba ïadei bad ka mat kaba kongsan bad ka jingdonkam ka dud ïa ki khyllung ba dangshu kha.
U ong “Ka jingroi ka jingsan jong ki khyllung, kadei ban long kaba paka bad kaba bha ha ka jingsumar”.
U la ong ruh ba ka Robert Hospital, ka long ka nuksa sha kiwei pat, haba ïadei bad ka jingsynñiang dud na ki longkmie, kaba long ka jingïarap na ka bynta ki khyllung.
