Shillong, Jymmang 19
Hadien ka jingpynbna ka ophis treikam ka District Medical Health Officer (DMHO) ka West Khasi Hills District & West Jaiñtia Hills District, ba baroh ki trai dukan pharmacy, ba kynthup ruh ki dukan die lang, ba kin hap ban khang ïa ki dukan jong ki, ha ka 20 tarik u Jymmang, 2026, hadien ba ka Meghalaya Health Care Association (MHCA) ka la pynbna ban ym ai ne die dawai ha katei ka tarik, ha baroh kawei ka ri, na ka liang ka All Meghalaya Pharmacist Association (AMPA) ka la mih shakhmat ban pynpaw ka jingpyrshah halor katei ka jingpynbna.
Haba kren sha ki lad pathai khubor ha ka 19 tarik u Jymmang, 2026, u Bah Nicky Lawai, Vice President, ka AMPA u la ong, ba kin ai ka jingkyrshan haba ïadei bad ban khang ïa ki online app, kiba ai dawai sha ki nongshnong, hynrei ban khang pat ïa ki dukan kin ym ai jingkyrshan satia.
U la pynshai ba kum ki ‘pharmacist’, ki don hi dalade ha la ki dukan ban ai dawai sha kiba wan thied bad kumta ka jingleh jong kiba pyrshah ka pyni ba ka don eiei sha lyndet.
U Bah Nicky u la buh jingkylli ruh halor ka jingpynmih ka DMHO ïa ka jingpynbna da kaba ong “Lada jia ei-ei ïa kiba plie dukan pharmacy ha katei ka tarik kaba la buh ban khang, ka Sorkar kan hap ban shim ka jingkitkhlieh.
“Kumno ka Sorkar ka leit ban kyrshan ïa ka jingpynbna ka Meghalaya Health Care Association (MHCA) ban khangdie dawai ha ka 20 tarik u Jymmang. Ngi kaba pyrshah halor kane, hato kan jia eiei lada jia ba ngin plie ïa ki dukan, bad lada jia eiei ïa ki paidbah ki bym ïoh ïa ki dawai, ka Sorkar hi kadei ban shim ka jingkitkhlieh,” u la ong.
Namarkata, u la ong ba ki paidbah kim dei ban shah ïalam bakla ha kane ka seng, kaba phah khang die dawai, da kaba bynrap “Ka Sorkar kadei ban phah khang shuwa ïa baroh ki dukan ki bym don pharmacist bad kaba nga mut ban ong ka long, ba u pharmacist u dei ban don beit hapoh dukan”.
Haba kylli, u la ong ba lada jia ba khang ki pharmacist ban die dawai kan sa ktah ïa ki paidbah, namar ba ki paidbah ki donkam beit ban thied dawai ha kano-kano ka por.
