Shillong, Jymmang 20
U Working President ka NPP Marcuise N Marak uba long ruh u Myntri ka Sorkar Jylla ha ka sngi Balang u la ther kylla ïa u nongïalam ka BJP bad MDC ka Tura Bernard N Marak halor ka jingkam ba u Myntri Rangbah Conrad K Sangma u don ka jingïadei ba ïajan bad u MLA barim Esmatur Mominin, hadien ka jinglait jamin ka jong u.
Haba shim ïa kane ka jingkynnoh “ka bym lah ban pdiang da lei lei ruh”, u Marcuise u la ong ba ka executive ne ka Sorkar kam don bynta eiei ha ki rai jong ka Judiciary ne ïingbishar.
“Kumta, ka jamin ka dei kaba la ai da mano?, Hato dei u Myntri Rangbah uba ai jamin?. Em, ym dei u Myntri Rangbah, ka jamin ka dei kaba ai da ka ïingbishar,” ong u Marcuise haba ïakren bad ki nongthoh khubor.
“Kumta balei u Bernard um kylli na ka ïingbishar bad ong ba u Myntri Rangbah u la ïarap. Ka long kaba khlem nongrim suda. Ka dei ka jingkren ka bym lah ban pdiang bad ka dei kaba la shu ai tang ban ïalam bakla ïa u paidbah”, ong u Marcuise.
U la kdew ïa ka jingphiah ïa ka bor treikam hapdeng ka executive bad ka Judiciary kumba la pruid dak ha ka Riti Synshar.
“Ha ka riti synshar paidbah jong ngi, ka Executive, Judiciary ki dei ki bor treikam kiba trei la ki jong ki kam. Katkum ka riti synshar, ka Judiciary kam sngap ïa ka Executive”.
Haba kdew ba ka Sorkar Jylla ruh kala ïakhun pyrshah ïa ka mukotduma ha ïingbishar, u la ong, “Wat ngi ruh ngi don bun ki mukotduma ba dang sahteng ha ki ïingbishar ïa kaba ngi la ïakhun pyrshah hynrei u Bernard Marak u la kynnoh ïa u Myntri Rangbah ba u ïarap ïa u namar ka jingïoh jamin”.
“Kane ka dei ka bym lah ban pdiang, ka dei kaba ïalam bakla naba ka dei ka judiciary kaba la rai ban ai jamin, halor kaei, ngim don jingtip. Namarkata, ka dei ka jingkynnoh ka bym don nongrim,” ong u Marcuise.
