Ka jingduna ki nongri masi kala wanrah jingeh ha ka jingpynbiang dud: Dr. P Sohlang

Nongstoiñ, Jymmang 20

Ka ophis jong ka Dairy Officer, West Khasi Hills District ha ka sngi Balang, kala pynlong ïa ka Dairy Awareness Programme halor ka phang “Health Benefits of Consumption of Milk and Milk Products” lane ka “Jingmyntoi jong ka dud bad kiwei pat ki jingbam kiba mih na ka Dud” ban pynsngewthuh paidbah halor ka jingdonkam jong ka dud bad kiwei pat ki jingbam kiba mih na ka dud na ka bynta ka koit ka khiah bad ka bam kaba tei met.

U Dr. P Sohlang, A.H. & Veterinary Officer, u la long kum u kongsan ha ryngkat ka jingdonlang u Dr. A.M. Umlong, A.H. & Veterinary Officer, ryngkat bad ki nonghikai skul, ki samla pule bad kiwei kiwei kiba la wan jingïashim bynta.

U Dr. P. Sohlang u la ong ba ka West Khasi Hills District kam pat lah ban biang hi dalade ha kaba ïadei bad ka jingpynmih dud bad ba ka Nongstoiñ ka dang shaniah ha ka jingwanrah dud na Shillong ban pyndap ïa ka jingdonkam ki paidbah.

U la ong ruh ba ka jingduna ki nongri masi kala wanrah jingeh ha ka jingpynbiang dud bad u la ban jur ïa ka jingdonkam ban kyntiew ïa ka kam ri masi hapoh ka district.

U la ong ruh ba wat tang lada ri kawei ne ar tylli ki masi ruh ka lah ban ïarap shibun ïa ka jingïoh jingïarap bad ka kamai kajih jong ka longïing. U la kyntu ruh ïa ki samla pule ba kin shim ïa ka kam ri masi bad kiwei ki kam vocational kum ki lad jingïoh kamai hi.

Da kaba kdew ruh ïa ka jingroi sted jong ka Artificial Intelligence (AI), u la ong ba ki dang don bun ki jaitkam kum ka ri jingri, ka rep ka riang bad kiwei kiwei kiba ka AI kam lah ban leh hynrei kiba lah ban ai jingïohkamai bad jingïarap ïa ki longïing longsem. U la kyntu ruh ïa ki samla pule ba kin don ïa ka “Plan B” ha ka jingim khnang ba kin lah ban ïeng ha la ki jong ki kjat bad jingïoh jingïarap hi.

Ha kane ka prokram, ki nongkren kila batai halor ki jingmyntoi jong ka jingbam dud bad kiwei pat ki jingbam kiba mih na ka dud, khamtam eh na ka bynta ka jingroi bad ka jingkhlaiñ jong ki khynnah bad ki samla pule.

Kum shi bynta jong ka prokram, la sam ruh ïa ka dud sha baroh ki samla pule kiba la wan ïashim bynta ha kane ka prokram ai jingpynshai.