Nang ïoh bor ka NPP ha Ri-lum Garo ba wan pynïasoh ki nongïalam na kiwei ki seng

Shillong, Jymmang 20

U State Working President ka NPP bad Myntri Sorkar, u Marcuise N. Marak ha ka Sngi Balang u la ong ba ka seng ka la sakhi ïa ka jingnang kiew bad ka la nang ïoh bor ha Ri-lum Garo, ha kaba bun ngut ki nongïalam na kiwei-kiwei ki seng saiñ pyrthei ki la wan shakhmat ban pynïasoh sha ka National People’s Party.

“Hynnin ka sngi ha ka jingshisha, nga dang don ruh ïa ka jingïalang ‘Party Executive’ ha North Garo Hills ha kaba ngi pdiang sngewbha ïa kiba bun ngut ki nongïalam na kiwei pat ki seng saiñ pyrthei,” la ong u Marcuise.                                  

U la bynrap ruh ba ka District Committee ka la rai ban pdiang ïa kito kiba wan rung thymmai katkum ka jingtbit jong ki.

“Kumta ha ka District Committee, ngi la rai hynnin ka sngi bad nga la kyrpad ïa baroh ki nongïalam Block bad distrik, baroh ki MLA hangtei ba kito ki nongïalam kiba dang wan na kiwei pat ki seng saiñpyrthei, ngi shna da ka thup kyrteng bad ngin pyrshang ban pynrung ïa ki ha ki kyrdan jong ka seng – ha kano-kano ka kyrdan jong ka distrik ne Block katkum ka jingtbit jong ki,” u la ong.

U Marcuise u la ïathuh ba kum kine kijuh ki jingjia la ïoh jingtip ruh na South West Garo Hills.

“U Myntri Rangbah ka Jylla u la don ha South West Garo Hills ha kaba u dang pdiang ïa bun bah ki nongïalam bad ki nongbud na South West Garo Hills bad ki la pynïasoh sha ka NPP,” la ong une u nongïalam.

“Kumta, ngi la nang kiew bad ïoh bor ha Ri-lum Garo. Kumta bun kiei-kiei kiba jia ha Ri-lum Garo,” u la ong.

U Myntri u la pynshong nongrim ïa kane ka jinglong-jingman haba ïadei bad ka roi ka par kaba dang ïaid shakhmat ha ka thaiñ hapoh ka jingïalam u Myntri Rangbah ka Jylla, u Conrad K. Sangma.

“Ki briew ki la ïohi ïa ki jait jingkylla kiba jia ha Ri-lum Garo. Ki briew ki la ïohi ha kano ka rukom ba u Myntri Rangbah u la thaw ïa ki lad ki lynti na ka bynta ki paidbah, u la thaw ïa ki jingtei ha ka liang ka pule-puthi bad ki skulbah bad ngi dang pyrshang ruh ban wanrah ïa ka ‘Medical College,” u la ong.

“Kumta bun kiei-kiei kiba jia bad haba ïohi ïa kane, ki briew ki pynïasoh sha ka National People’s Party jong ngi,” bynrap biang u Marcuise.