Shillong, Nailur 03
Ka jingdon jong ki kyrtong kiba la seisoh ha ka Meghalaya Teacher Eligibility Test (MTET), 2026 ka long palat 84%.
Kane, ha kajuh ka por, ka dei ruh kaba heh tam haduh mynta, ban sakhi ïa ka jingdon ki kyrtong kiba ‘pass’ bun eh ha kane ka eksamin.
Ka risol ba la pynbna ha ka Sngi Palei da ka Directorate of Educational Research & Training (DERT) ka pyni ba kiba ‘pass’ ha ka ‘Paper-I’ ki long 84.30% katba ha ka ‘Paper-II’ ki long 85.32%.
Na ki 21,999 ngut ki kyrtong kiba la thoh ïa ka ‘Paper-I’ kaba dei na ka bynta ki klas I haduh V, 18,546 ngut ki la seisoh.
Na ka bynta ka ‘Paper-II’ haba ïadei bad ki klas VI haduh VIII, 18,672 ngut na ki 21,884 ngut ki la seisoh.
Kane ka pyni ïa ka jingkiew kaba khraw na u snem 2025 ha kaba kiba ‘pass’ ki long 63.15% na ka bynta ka ‘Paper-I’ bad 64.43% na ka bynta ka ‘Paper-II’.
Ha u snem 2023, ki jingkheiñ ki long kiba hiar bha, kata haduh 8.11% bad 9.27%.
Ka MTET, kaba la pynlong katkum ki kyndon jong ka NCTE, ka long kaba donkam ban shah thung kum ki nonghikai ‘Elementary’ ha ki skul Sorkar.
Ka DERT ka la pynlong ïa kane ka eksam naduh u snem 2019.
Ïa ka eksamin jong u snem 2026, la pynlong ha ka 24 tarik u Naitung ha kylleng ki 113 tylli ki jaka kiba kynthup ïa baroh ki distrik bad ki Sub-Division.
Ka Director ka DERT, Kong JU Kharpuri ka la ong ba ïa kane ka eksam la pynlong ha ka rukom kaba beit ba ryntih, bad kaba khuid ba shai.
Ka la ong ba ka Directorate ka la pynbiang ïa ki kot ïarap MTET (2026) na ka bynta baroh ar tylli ki ‘Paper’ bad ka jinghikai ha ka ‘YouTube’ halor ka jingpyndap ïa ka ‘OMR Sheet’ ban ïarap ïa ki kyrtong, khamtam ki nonghikai ba la don ha ka kam kiba la don ha ka jingshakri la katto-katne snem mynta.
Ki kyrtong ki lah ban peit ïa ki risol ha ka www.megeducation.gov.in.
Ka Kong Kharpuri ka la ong ruh ba ka DERT ka thmu ban pynlong shuh sa kumba 3 tylli ki eksamin MTET – la kumno-kumno ha u Kyllalyngkot-2027, Nailur-2027 bad Lber-2028 – hashuwa jong ka por ba la buh da ka Supreme Court, ban ailad biang ïa kito ki bym shym la lah ban pyndep ne seisoh ha kane ka kynti.
