Shillong, Nailur 03
Ka Special Investigation Team (SIT) ka tnad pulit, kaba la thung ban tohkit ïa ki kam thombor ba jia ha ka rally thuk-thuk ka Khasi Students’ Union (KSU) ha ka 19 tarik Nailar, ka la kem sa ïa u wei u nongïalam kane ka seng, kaba ka jingkem ka la poi sha ka san ngut.
Haba kren sha ki lad pathai khubor, u Bah Vivek Syiem, Superintendent of Police ka East Khasi Hills u la ïathuh ba u nongïalam ba dangshu shah kem udei u Samla Samuel Kharbani, General Secretary ka KSU Shillong Mihngi Circle.
Ka jingkem ïa u Samuel kadei ha ka sngi Palei, hadien ka jingpynshisha ïa ka jingdonkti jong u ha ki kam thombor myn ha ka 19 tarik u Nailur 2026, la ong u Bah Vivek.
Ki nongïalam ka KSU Shillong Mihngi kiba la shah khot hajir kidei ar ngut, ba kynthup ïa u Samla Samuel Kharbani bad u Samla Celestine Lyngdoh, hynrei ki pulit ki la kem noh syndon ïa u Samuel, ba la kdew ba u donkti mynha ka 19 tarik.
“Katba ka jingshim jingthoh ïa ki jingbatai (statement) jong ki ka dang ïaid, ka SIT ka la shong bishar ïa ka bynta jong ki ha ki kam thombor ba jia ha ka 19 tarik u Nailar, 2026,” ong u Bah Vivek.
“Hadien ba pynthikna ha ka por ba tohkit, ïa u Samuel Kharbani la kem noh da ki pulit. Ki Pulit kim shym la lap ei-ei ïa ka jingdon bynta u Celestine Lyngdoh bad kumta la pyllait noh ïa u” la bynrap u Bah Vivek.
Shuwa kane ka jingkem, ki pulit ki la kem ïa 4 ngut ki nongïalam ka KSU, namar katei ka jingjia ba 19 tarik Nailar, kaba lam sha ka jingshah thang ki kali, shah pynjulor 31 tylli ki kali bad shah shoh haduh 16 ngut ki briew.
