Shillong, Nailur 03
Wat hadien hynriew bnai jong ka jingjia tih dewïong beaiñ ha Myn-sngat-Thangsko kaba la shim ïa ki 34 tylli ki mynsiem briew ha East Jaiñtia Hills, ka jingtohkit jong ki pulit kam pat dep naba ki kaiphod post-mortem jong baroh kiba ïap ki dang sahteng, la kdew ka Justice BP Katakey Committee.
Ha ka kaiphod shipor kaba 40 (40th interim report) kaba la aiti sha ka Meghalaya High Court, ka komiti da kaba kdew ïa ki jingtip na ka tnad Home (Police) halor ka jingtohkit jong ka SIT ïa ka Khliehriat PS Case No. 14/2026, ka la ong ba ïa ka charge-sheet la mudui ha ka 18 tarik Rymphang, 2026, bud sa ki supplementary charge- sheet ha ka 24 tarik Rymphang bad 6 tarik Jymmang.
Katba ha ka 21 tarik u Jymmang la lum haduh 15 tylli ki kaiphod post-mortem na West Jaiñtia Hills, kawei ka kaiphod na Ri-Bhoi dang ap mynta.
La pyntip sha ka komiti ha ka jingïalang jong ka ha ka 25 tarik u Nailar ba ym pat ïoh ïa ka kaiphod jong baroh 34 ngut kiba ïap.
“Ka tnad pulit ka donkam ban pynsted ban lum ïa baroh ki kaiphod post-mortem ba dang sah bad ban pyndep ïa ka jingtohkit,” la peit bniah ka kynhun, da kaba kdew ba la palat hynriew bnai ki la shu leit kumto naduh ba jia katei ka jingjia.
Ka kaiphod ka la kdew ruh ïa ki kam pyntreikam ba la leh hadien ka jingjia – 90 tylli ki FIR na ka bynta ka jingsei be-aiñ, 22 tylli na ka bynta ka jingkit be-aiñ, 4 tylli na ka bynta ka jingtuh ïa u dewïong ba la kurup bad 2 tylli na ka bynta ki tiar pynbthei. Ki kynhun pynjari aiñ ki kynthup ïa 4 tylli ki mobile patrolling, 4 tylli ki kynhun pahara ïaid kjat, 5 tylli ki flying squad bad 4 tylli ki jaka talasi jong ka NGT, ha kaba la pynlong ruh 92 tylli ki jingpeit bniah da ki drone haduh mynta.
Katkum ka kaiphod, la ïoh kurup 18,962.966 MT u dewïong, 57 tylli ki kali, 5.5 kilo gelatin bad 74 tylli ki detonator bad 10 tylli ki mashin la pynpra noh.
Arngut ki heh pulit kata u S.I. O Nongtdu, In-charge jong ka Umpleng Outpost, bad u A.B. S.I. S Sympli jong kajuh ka jaka treikam, la sospon noh ïa ki ha ka 9 tarik Rymphang, bad la hukum ïa ka jingtohkit wad bniah ha ka 23 tarik Lber ban tohkit la ka don ne em ka jingleh bakla.
