Shillong, Nailur 03
Ki nongïalam ka Seng Longkmie Nongmensong, kiba la wan ban synranlang ïa ki nongïalam ka Khasi Students’ Union (KSU) Shillong Mihngi Circle, ha ka jingshah khot hajir ha ki pulit ka Sadar Police Station, ki la pynpaw ka jingbynniaw halor ka jingleh ki bor ka aiñ.
Haba kren bad ki longkmie ba kynthup ïa ka Kong Margereth Khriam, President, bad ka Kong Priya Rynjah, ki la pynpaw ka jinglyngngoh ba ki pulit ki la kem ïa kitei ki ar ngut ki nongïalam, da kaba kdew ba u Celestine lei u khlem poi ha katei ka rally ba pynlong ka KSU.
Ki la ong ba ka long kaba sngewsih, ba ki pulit ki la khot hajir ïa ki halor kawei ka mukotduma, hynrei haba poi ha Police Station pat, ki kem noh pynban ïa ki namar kawei pat ka mukotduma.
Ha ka jingjia kaba dang jia shen ha ka Public Hearing ha East Jaiñtia Hills District, ka la don ka jingshah tih ka surok nalor ka jingshah kawang maw ki briew, hynrei haduh mynta kim pat ïohi ban don kiba shah kem, da kaba buh jingkylli, balei kim pat kem ïa kiba donkti.
Kine ki longkmie ki la kynnoh ruh, ba don kiba ai pisa ïa ki briew ban phah pynkulmar ha ka rally arshaka, ba la pynlong da ka Khasi Students’ Union (KSU) ha ka 19 tarik u Nailar 2026.
“Hashuwa ban sdang ka rally, ki nongïalam ka KSU ki la dep ban bthah ban ïaid da ka akor ka burom, hynrei ngi ïohi lyngba ki rynsan social media ba ki don ki scooty kiba leit rung sha ka rally. Hooid ngim ong ba ngi pyrshah ïa ka Sorkar ba kin kem ïa kita kiba leh, hynrei ban kem ïa ki nongïalam kiba lui-lui, ym lah ban pdiang,” ki la bynrap.
