Shillong, Nailur 03
U MP barim ka Rajya Sabha Dr. W.R Kharlukhi uba dei ruh u President barim ka NPP Meghalaya state unit u la ong ba ha ka National Peoples’ Party (NPP) ki la ïa bun kiba lah ban trei.
Haba ïakren bad ki katto katne ki nongthoh khubor, u la ong ba ka jingmih noh jong u na ka NPP kam dei ba shah leh lyndet namar ma u ruh u la don slem ha ka NPP.
“Ngam ju kynnoh ïano-ïano haba nga la mih hynrei ban kylli na kaei ka daw ba nga mih ka shong beit ha ka jingstad jong ki nongthoh khubor ban twad jingmut,” u la ong.
Haba kylli la u don jingthmu ne em ban rung sha kiwei ki seng saiñpyrthei, u la ong ba un dang bishar bniah ïa kiwei ki seng kumno ki wanrah ïa ki kam pynroi hapoh ka Jylla.
Ha kajuh ka por u la pyntip ba ïa ka shithi iehnohkam kum u dkhot ka NPP la pdiang naduh kato ka sngi ba u la phah shithi sha u Bah Prestone Tynsong uba dei u President ka NPP Meghalaya unit.
Kumban shu pynkynmaw u Dr. W.R Kharlukhi u la phah shithi sha u Bah Prestone Tynsong ha ka 24 tarik u Nailar 2026 ban pyntip ba u la mih noh na ka NPP. U la ai khublei ïa ki nongïalam ka NPP kiba la kyrshan ïa u haba u dang don ha ka seng. Kumta u la kyrpad ïa u Bah Prestone ba un pdiang ïa kane ka shithi iehnoh jong u.
U Dr. W.R Kharlukhi u la don jingïadei bad ka ïing jong u P.A Sangma naduh ba la seng ïa ka NCP bad hadien ba la seng ïa ka NPP kaba la kot haduh 27 snem hynrei kynsan-kynsan ka jingïatreikam ka la kut noh ka jingïadei ha ka 24 tarik mynta u bnai Nailar 2026.
