Shillong, Nailur 03
U Advocate General ka Jylla u Amit Kumar ha ka sngi Palei u la mih ban ai jingpynshai hadien ba la don ka jingïakhih ki Muktiar (Lawyer) kiba dawa ban weng ïa u, bad u la ong ba ki jingkynthoh jong u halor ka jingkynnoh jrongkti u muktiar ïa ka samla pule ba wan leh Intern ka dei kaba la pynman bakla kum ka jingkynthoh ïa ka Bar Association baroh kawei.
U Amit Kumar u ong ba kane ka kynrum-kynram ka mih hadien ba kawei ka samla pule ba leh Intern ka la ujor pyrshah ïa ka jingshah jrongkti khlem akor ha uwei u dkhot ba la rangbah jong ka Bar. “Kane ka jingïakynduh bad ki lad pathai khubor kam long pyrshah ïa ki Bar Association lane ki dkhot jong kine ki Bar. Nga dang dei u dkhot ka Bar, la nga dei u AG ne ym dei ruh” u la ong.
“Ka jingjia ba sngewsih kaba jia. Kane ka samla pule ba leh Intern ka la mih shakhmat bad mudui ïa ka jingujor. Ki kynhun sengbhalang ki la leh eiei halor kane, kaba long ka kam ba sngewsih. Ngim dei ban shim ïa ka aiñ ha la ka jong ka kti” u la ong.
Katkum ka jingong u Amit Kumar, ïa ka Case la Register ha ka 29 tarik Naitung pyrshah ïa une u muktiar ba la rangbah, katba ïa ka Ejahar la Register ha ka 31 tarik Naitung pyrshah ïa kito kiba shoh ïa une u Muktiar, hadien ba ïa kane ka jingjia la shimkhia da ka High Court.
“Ha ka 31 tarik Naitung, 87 ngut ki Muktiar ki la ai jingthoh sha ka High Court Bar Association ba dawa ïa ka bor khmih ba kan peit ïa kum kine ki jingujor bad ban pynthikna ïa ka jingtreikam kaba shngaiñ na ka bynta ki Muktiar kynthei” u la ong.
“Ka High Court ka la pan ïa ka kaiphod halor ka jinglong jingman ka kam bad ngi la aiti ha ka 3 tarik Nailar, kaba pynpaw ba ïa u nongshah kynnoh la dep ban kem” u la ong.
U Amit Kumar u la kam ba une u juh u Muktiar u dei u ba la shah kynnoh teng ha kum kine kijuh ki kam kham mynshuwa.
“Shuwa ka 3 tarik Nailar, kawei ka Muktiar Sorkar ba dang khynnah, ka la pyntip ïa nga ba kane ka jingjia (shah jrongkti ka samla leh Intern) kam dei satia kaba dang jia ha ka sien ba nyngkong, une u juh u briew la kynnoh ba u la jrongkti khlem akor ïa kane ka Intern ha u 2017. Na ka Case Diary, nga shem ba ha u snem 2024 ruh, kawei ka samla leh Intern ka la shah jrongkti ha une u juh u briew bad ïa ka ‘Statement’ jong ka la dei ban buh jingthoh” u la ong.
U Amit Kumar u ong ba une u Muktiar ba shah kynnoh u la don hapoh ka ‘Panel’ ka Sorkar naduh u 2013 bad ïa kine ki jingjia ba jia ha shuwa, um don jingtip satia tad haduh ba don kiba ïathuh ïa u.
U Amit Kumar u ïathuh ba ïa ka Case 2017 la pynkut noh namar ka jingduna ki sakhi watla ka ‘Statement’ kaba shai na ka lanot kaba la jer kyrteng ïa u.
“Ïa kane ka Case la pynwai noh wat hapdeng ki sakhi kiba biang. Kum u AG, ka dei ka kamram jong nga ban pynthikna ba la shimkhia ïa ka bha ka miat jong baroh ki dkhot. Nga khlem kynnoh ïa ka High Court Bar Association lane ka Shillong Bar Association” u la ong.
U ïathuh ba la don kiba bthah ïa u ban sei ïa ka kyrteng jong ka nongmudui, hynrei u la kyntait. “Ka dei ka kamram jong nga ban ym sei ïa ka kyrteng jong ki lanot” u la ong.
U ong ba dei namar kine ki jingkynthoh ba u la shah beh na ka Bar Association ha ka 5 tarik Nailar. “Nga la pan ïa ka lad ban pynshai ba nga khlem kren sniew ïa kino-kino ki dkhot ka Bar. Ïa kane ka kam la pynpoi sha ki National Media bad ka Supreme Court Bar Association ka la kyntu ïa ka Meghalaya High Court Bar Association ban weng noh ïa ka rai jong ki” u la ong.
“Lada kaei kaba nga kren ka la pynmong ïano-ïano, ki la dei ban leit rah sha ka High Court ba kan leh eiei pyrshah ïa nga. Ha ka jaka kane, ki la kynnoh shimet pynban ïa nga ba nga ïarap ïa ki Muktiar na Delhi bad pyndonkam bakla ïa ka Ophis jong nga” u la bynrap.
Haba kyntait ba u la shim ‘Advance’ ba T.3 klur na ka Tnad Aiñ, u Amit Kumar u la ong “Ha kine ki phra snem shiteng kum u AG, Ngam pat ju shim shi naïa ruh kum ka ‘Advance’. Ki la dei ban pynthikna shuwa ïa ka jingshisha. Nga pdiang ïa kano-kano ka jingtohkit da ka Sorkar Jylla. Ka jingshisha ka dei ban mih”
Halor ka jingkynnoh ba ai kam ïa ki Muktiar nabar Jylla, u la ong baroh 39 ngut ki Muktiar Sorkar ki dei na Meghalaya bad 11 ngut kiwei pat, kynthup ka kurim jong u bad u khun, ki trei na ka bynta jong u khlem da phah siew ha ka Jylla.
“Naduh ka 1 tarik Nailar haduh 31 tarik Nailar, Nga la khmih haduh 1001 tylli ki kam, ki jingai jingmut, ki jingpynshna ïa ki jingthoh bad ka jingleit ïasaid mukotduma. Kane ka kam ka donkam ïa ki nongkyrshan ban wadbniah. Ym don uwei ruh na kine ki 11 ngut ki Muktiar, kynthup ki bahaïing hasem jong nga, ki la pan jingsiew ha kine ki phra snem shiteng. Lada ki don ïa ki sakhi ban pynshisha ba ki pan pisa, Ngan ïehnoh na ka kam” u la ong.
