Shillong, Jymmang 20
Ka kynhun ki nongkhaïi bad nongtrei marpoh khyndew kaba la tip kum ka State Co-ordination Committee of Coal Owners Miners & Dealers, Exporters Forum, ha ka jingïalang ba la long ha ka 19 Jymmang 2026 ki la ïoh ban ïa pyrkhat haba ïadei ki jingeh bad ka jingshah ktah jong ki na ka daw ka jingkhang ban tih Dewïong ha ka Jylla.
“U Dewïong kumba ngi ïa tip lut ïa ka jingkordor bad ka jingmyntoi jong u bad uba la bsa ja ïa ki hajar ngut ki paid bynriew jong ka Jylla ha kiba bun ki liang, hynrei ka jingshah khang ban tih da ka rukom mynbarim ne tih thliew khnai ïa ki par Dewïong ka la ktah jur ïa ki bun balang” ong ka kyrwoh khubor u Bah Mosrophar Khar-kongor Secretary jong ka SCCCOM&DEF.
Ki trai par, ki nongkhaïi Dewïong kiba la wan na kylleng ka Ri Khasi-Jaiñtia bad Garo ha katei ka jingïalang ki la pynpaw ba ka kynhun ka ïai trei ban buddien ïa kane ka kam khnang ban lah ban ïoh ban plie biang ïa ka jingtih Dewïong ha ka Jylla.
Ka Forum ka long ka Seng ba hakhliehduh ha ka Jylla ïa ki trai par bad nongkhaïi Dewïong, ka la ïoh lad ban pynkhreh ïa ka rukom tih Dewïong ba thymmai ïa kaba la ai kyrteng kum ka ‘Small Scientific Underground Coal Mining’ ha ka jaka jong ka rukom tih ba mynbarim ne kata ka la ju khot ka ‘Open Cast Coal Mining’.
“Ka jingpynkhreh ïa ka ‘Draft Mining Proposal’ (DMP) kaba thymmai la sam sha baroh ki seng kiba khmih bad peit ïa ka kam Dewïong ba kin bishar bniah halor jong ka bad katkum ka jinglong jingman jong u marpoh khyndew ha ki thaiñ ne jaka jong ki bad ba kin pyndep noh kloi ïa kane ka jingbthah khnang ban ïoh pynkhreh ïa ka ‘Final Proposal’ ban ïoh ai sha ka Sorkar lyngba u Myntri Rangbahduh ka Jylla ban khmih bad ban sngap ïa ki jingai jingmut khnang ban ïoh plie biang ïa ka kam tih bad khaïi Dewïong ha ka Jylla.”
La ong ba kane ka jingai jingmut kaba thymmai kan kynthup ïa ka jingpynneh bad jingsumar ïa ka Mariang, ka jingsumar ïa ki um ba mih na ki thliew par Dewïong, ka jingïada ïa ki nongtrei par Dewïong nalor kiwei ki lad ki ban pynmyntoi ruh ïa ki trai par bad nongkhaïi Dewïong ha kajuh ka por ban pynheh ruh ïa u saipan Sorkar na ki khajna ban ïohlum na u Dewïong.
