Shillong, Jymmang 21
U Symbud Myntri Rangbah ka Jylla bad MLA ba la jop saw sien lynter na Nartiang Bah Sniawbhalang Dhar u la kynthoh ïa ka jingpynsngew u President ka VPP Bah Ardent M Basaiawmoit ba u lah ban ïakhun noh ïa ka ilekshon MLA 2028 na Nartiang Konstitwensi da kaba ong, “Mano mano ruh ki don ïa ka hok ban ïakhun ïa ka ilekshon na kano-kano ka jaka bad ngam dei satia u trai ka Nartiang konstitwensi”.
“Ynda la wan ka ilekshon 2028, balei ngin hap ban da khot sngewbha ïa ki briew? Baroh ki long laitluid ban ïakhun,” ong u Bah Sniawbhalang haba jubab sha ki nongthoh khubor halor ka jingpynpaw u Bah Ardent.
U la ong, “U Bah Sniawbhalang un ïakhun, ka UDP kan ïakhun, ka BJP ruh kan ïakhun, ka VPP ruh kan ïakhun, hynrei ngan ong tang kawei ha ka konstitwensi jong nga, mano mano ruh ki lah ban ïakhun, ngam lah ban khang ïa ki”.
“Nga dei tang u MLA ka Nartiang konstitwensi, ngam dei u trai jong ka konstitwensi namar kata baroh ki don hok ban wan ïakhun ilekshon napoh ka konstitwensi ba nga mihkhmat,” ong u Bah Sniawbhalang.
Halor ka jingkylli la kan ktah ne em ïa ka NPP kaba ïatreilang bad ka BJP ban ïoh jingjop ha u 2028, u Bah Sniawbhalang u la ong ba ki nongthep vote kin jied katkum ka jingtreikam.
“Phi ïohi, kam don satia ka jingtynjuh ha u 2028. Ki paidbah ka Jylla ki tip ïano ban vote bad ïano ban nym ai vote,” u la ong.
U la ïada ba ka jingïatreilang bad ka BJP kala ai jingmyntoi ïa ka Jylla. “Watla ngi ïatreilang bad ka BJP, hynrei ki nongrim treikam ki pher bad hooid ngin ïoh ruh ïa ki kam pynroi na ka Sorkar Pdeng,” u la ong.
