Shillong, Jymmang 21
Palat 1,300 ngut ki samla pule ki la shah kynthup hapoh ka shatri jong ka ‘Youth & Science Outreach’ ka North Eastern Council (NEC) na ka bynta u snem 2025-26, katba ka Council ka la nang pynïar ïa ki 2 tylli ki sienjam ba kongsan jong ka – ka ‘Ashtalakshmi Youth Exchange Programme’ bad ka ‘NE-SPARKS’.
Ha ka ‘Ashtalakshmi Youth Exchange Program’ la sakhi ba 581 ngut ki samla pule na ki skulbah bad kolej ha kylleng ka ri kiba la wan sha ka Thaiñ Shatei Lam Mihngi ban leit jngoh ïa ki shlem pule ba paw jong ka thaiñ.
Napdeng jong ki, 44 ngut ki samla pule na Delhi bad Odisha ki la wan jngoh ïa ka IIM-Shillong kum shi bynta jong kane ka jingïakylliang.
Ka NEC ka la ong ba ka prokram ka long shi bynta jong ka jingpyrshang kaba kham heh (jong ka) ban pynkhlaiñ ïa ki “sienjam pynroi jong ki samla bad ki jingthmu ha ka liang ka saian”, ha kajuh ka por haba kyntiew ïa ka jingshem ha ka pule-puthi haba ïadei bad ki kolshor bapher-bapher.
Ha kawei ka liang, ka sienjam ha ki kam haw-haw jong ka Council, ka ‘NE-SPARKS’ – ‘North East Students’ Programme for Awareness, Reach and Knowledge on Space’ – ka la ailad ïa 786 ngut ki khynnah skul na baroh 8 tylli ki Jylla ka Thaiñ Shatei Lam Mihngi ban leit jngoh ïa ka Indian Space Research Organization (ISRO) ha u snem 2025-2026.
Kane ka kynhun ka kynthup ïa 99 ngut ki khynnah pule na Meghalaya.
“Ïa kitei ki jingleit jngoh la pynwandur ban kyntiew ïa ka jingsngewthuh shaphang ka saian bad ban pynshlur ïa ki khun samla haba phai sha ka liang ka jingwad ïa ki buit thymmai bad ka saian jong ka haw-haw,” ong ka NEC.
