Shillong, Jymmang 21
U Bah Wankitbok Pohshna uba dei u General Secretary ka BJP Meghalaya Unit u la ong ba ka jingmih ka Cockroach Janta Party ka long kum ka lyer langthari namar la shu pynbna ïa kane ka seng saiñpyrthei tang ha rynsan social media.
Haba ïakren bad u Bah Wankitbok Pohshna, u la ong ka BJP ha Meghalaya bad ha ri India kan nym don kano kano ka jingsheptieng haba mih kane ka seng thymmai namar ki la sngewthuh ba tang ïa ka kyrteng ruh ki la pynlong kamkai ïa ka kam shakri paidbah.
U la ong ba ka BJP kan nym don ka jingsheptieng lada dei ha Meghalaya ne ha ri India namar kito kiba thaw ïa kane ka seng thymmai ka dei kaba don kiba ai jingmut na sha lyndet ban wanrah ïa ka jingbym shongsuk hapoh ka ri.
Shuh shuh u la ong ba ki paidbah ka ri India ki dang ai jingshaniah ïa ka BJP namar la ïoh ban synshar ha West Bengal bad ha Assam.
U don jingkyrmen ba ki paidbah ha Meghalaya kin sa ai jingshaniah ïa ka BJP bad hangta kin sa ïohi ïa ka jingkylla jong ka Jylla.
Kumban shu pynkynmaw ba ka jingsaphriang ka durkhih kaba u nongbishar ba hakhliehduh ka ïingbishar ka Supreme Court u Surya Kant ha ka 15 tarik u Jymmang 2026 u la kynthoh ïa ki samla kum ki ñiangkalaw, ki bym ïoh kam ne bym don jaka ha ka kam ka jam, don napdeng jong ki kiba kylla long ki lad pathai khubor paidbah ne ki social media, don napdeng jong ki kiba kylla long ki nongïakhih RTI bad kiwei.
Ha ka sngi kaba bud, u Abhijeet Dipke u la pynbna lyngba ka rynsan X ïa ka jingpynmih ïa ka rynsan na ka bynta baroh ki khun samla ne kita ki ‘ñiangkalaw’ kiba na kylleng ka Ri,
Kum ban shu kdew kane ka website jong ka seng kaba la tip kum ka Cockroach Janta Party ka la paw pyrthei ha ka 16 tarik u Jymmang hapoh ka jingthoh “Ka sur jong kiba jaituh & kiba khlem kam” ha kaba tang hapoh san sngi shi klur ngut ki khun samla kiba la pynrung kyrteng ha instagram.
Kane ka jingïakhih naduh kata ka por ka la saphriang sha ki Jylla jong ka Ri, kynthup ïa ka Bihar, Madhya Pradesh, Uttar Pradesh, Jammu and Kashmir, bad Himachal Pradesh bad mynta ruh ka la saphriang ha jylla Meghalaya.
