Shillong, Jymmang 21
Ka Voice of the People Party (VPP) Youth Wing, ha ka 21 tarik u Jymmang 2026, hapoh ka jngïalam u Bah Marbud Dkhar, President, ka la leit ban ïakynduh ïa ka Additonal Deputy Commissioner, East Khasi Hills District, ka P.K Sangma, haba ïadei bad ka jingker da ki tin blue ha Polo, kaba ka seng kam pat ïoh ka jubab kaba shai halor kane.
Haba kren sha ki lad pathai khubor, u Bah Marbud u la ong ba ka ophis ka Additonal DC, ka la kynting ïa ka VPP YW sharum shaneng bad kim shym la ïoh ïa ka jubab kaba shai.
Haba ïadei bad kane, u Bah Marbud u ong ‘Ngim banse ban wad noh da ka Right To Information (RTI)”.
U la ong ba katkum ka RTI, ba la ïoh da ka VPP YW, la lap ba ka jaka kaba don ha Polo hajan ka ophis National People’s Party (NPP), kaba la ker da ki tin rong blue, kadei ba la long trai da ki bar jylla.
U Bah Marbud u la ïathuh, ba ha ka RTI la lap, ba ki trai jaka hangtei kiba bun hi kidei ki bar jylla, bad na ka liang ka seng mynta ka sngi, ka pan jingshai na ka Additional DC ka Revenue halor kiba bun ki jingtip ki bym pat shym la pynshai bha ha kane ka RTI halor kane ka kam ker tin blue ha Polo.
U Bah Marbud u la pyntip, ba u Hermuz Lapsam uba dei u wei na ki trai katei ka jaka uba dei na Jaiñtia Hills, u la die ïa kine ki jaka sha ki 3 ngut ki bar jylla.
“Ka seng haba ïadei bad kane, ka la kylli ïa ka Additional DC, ba kumno ki bar jylla ki ïoh lad ban thied jaka, ka Additional DC ka la ïathuh, ba katei ka jaka ka hap hapoh ka European Ward, kumta ki bar jylla ki lah ban thied ïa katei ka jaka,” la ong u Bah Marbud.
“Ngim sngewïahap, ba ki bar jylla kin ïoh thied jaka ha Polo bad ka seng ka kwah ba kin pynduh pyndam noh ïa kine ki jaka, ba la ai sha kine ki bar jylla,” u la bynrap.
Namarkata, u la ong ruh ba ka VPP YW kan ïai buddien halor kane ka mat, lada ka ophis jong ka DC kam leh eiei.
