Shillong, Jymmang 21
Ka Synjuk ki Nongñiah Taksi Sor & Khapsor ha ka sngi Palei ka la leit ujor sha u Bah R. Hinge, District Transport Officer (DTO) ban ïakren halor ka jingbteng kiba kamai ar shaka beaiñ ki bym don ki kot ki sla kiba biang kaba la ktah ïa ka kamai jong ki taksi kiba siew khajna.
Haba ïakren bad u Bah Kmenlang Khonglah, President ka Synjuk u la ong ba ka jingdon jong kiba kamai ar shaka beaiñ, ka la long shisha ka jingduhnong ïa kiba kamai taksi kiba siew ïa ka khajna kaba rem ha ka shisnem.
U la ong kine ki ar shaka kiba kamai beaiñ ki buh jingma ïa ki paidbah lada ki kyllon ne ki mynsaw namar kim don ïa ka insurance.
U la ïathuh ba na ka liang u DTO, u la pynshai ba ka jingpynsangeh jong ki ban pynlong ïa ka jingtalasi ka dei namar ka jingduna briew ha ka tnad treikam hynrei u la kular ha ka Synjuk ban bteng biang ïa kane ka kam ha ki sngi ki ban sa wan.
U la ong ruh ba lada ka Sorkar kam sngap ïa ka jingdawa ban pynduh noh ïa kiba kamai beaiñ, na ka liang jong ki ruh kum kiba kamai kali, kin nym siew shuh ïa ka bai khajna.
U la kyrpad ïa ki samla ba kamai arshaka ba ki dei ban sngewthuh namar ki kamai khlem siew khajna namar ka ktah ïa kito ki arshaka kiba kamai kiba la dep ithuh da ka Sorkar.
