Shillong, Jymmang 21
U Myntri ka Sorkar Jylla, u Timothy D. Shira ha ka Sngi Palei u la ong ba ka jingïapynbeit pud hapdeng ka Assam bad ka Meghalaya ha kaba kut hi kan shong ha ki Myntri Rangbah jong baroh ar tylli ki Jylla bad kdew ba ki jingeh kim long kiba beit ryntih ha shi lynter jong baroh uwei u pud u sam.
“Ki don katto-katne ki jingïapher hapdeng ki nongshong shnong jong ka thaiñ khappud,” ong u Shira.
“Ngam tip na kaei ka daw ba ki briew kiba sah ha ka liang jong ka Assam bad ka liang ka Meghalaya, ki don beit ki jingïakynad, ki jingkam bad ki jingkynnoh ba markylliang,” u la ong.
Haba kiar ïalade na ki jingïakren kiba dang ïaid shakhmat, u Myntri u la ong, “Kata kan shong ha ka rai jong baroh arngut ki Myntri Rangbah jong ki ar tylli ki Jylla. Ngam don eiei ban ong halor kane namarba ngam don bynta kum u dkhot ha ka ‘Border Committee’. Ngam tip eiei shaphang kane.”
U Shira u la pynïapher ruh ïa ka jinglong-jingman bad la ka jong ka konstitwensi – kaba ïajan ruh bad ka Assam.
“Nga ruh nga dei na ka thaiñ khappud bad ka Assam. Ha ka thaiñ jong ngi, kam don kano-kano ka jingïa-ka-jia,” u la ong.
“Ki briew na ka liang ka Assam, ki wan, bad ki briew ki ïa im lang ha ka jingsngew shipara. Kam don kano-kano ka jingïapher,” u la ong.
U la bynrap ba ki kam rep na shiliang sha shiliang khappud ka la long ka rukom kaba la slem bah hangtei.
“Kiba kham bunsien, ki briew kiba sah ha Meghalaya, ki rep ha ki jaka ba dei jong ka Assam. Ngi siew khajna naduh ki por Phareng,” la ong u Shira.
Haba kylli la hato kane kajuh ka rukom ka lah ban treikam ha ki jaka ba don ki jingïa-ka-jia kum ka Lapangap, u la ong ba kane ka shong ha ka mon jong ka imlang-sahlang.
“Ka shong ha ki jingsngew jong ki paidbah, lada ki lah ban ïatreilang para ma ki, lada ki lah ban tei ïa ka jingïadei kaba bha, kan long kaei-kaei kaba pher bak-ly-bak. Lehse ka don kano-kano ka daw balei ba ka don beit ka jingïakynad hangtei,” u la ong.
Ki ar tylli ki Jylla ki la ïadon bynta ha ki jingïakren ban pynbeit ïa ki 12 tylli ki jaka ba don hapdeng ka jing-ïa-ka-jia ïa u pud u sam uba jrong 884.9 kilomitar, ha kaba ïa 6 tylli (ki jaka) la pynbeit katkum ka jingïateh kular jong u snem 2022.
