Mawkyrwat, Jymmang 21
Ka Picasso Pupils – An Art Society ha ka jingïatreilang bad ka Emage Architecture Studio, Slovakia, Europe, ka Meghalayan Age Ltd, ka Saitsnat Multipurpose Cooperative Society bad ka tnad Tourism ka Sorkar Meghalaya ha ka 20 tarik u Jymmang ki la pynlong ïa ka prokram ‘Pine Home Architecture Launch’ kum ka dak jong ka jingkmen halor ka jingseisoh jong ka jingpyntreikam ïa ka jingstad bad jingshemphang ki nong Europe ban tei ïa ka ‘Pine Home project’ ha ka shnong Mawlangwir, South West Khasi Hills District, kaba long ka jingtei ba phylla bad ba nyngkong eh ha ka distrik bad ha ka jylla.
Ïa kane ka Pine Home Project la bei tyngka da ka Sorkar Jylla lyngba ka Meghalayan Age Ltd. ha ka jinglut kaba T.4 klur tam, bad la tei ïa kane ka ïing da ki rangbah ba la tbit napoh ka distrik katba ïa ki dur ki dar jong ka jingshna (architectural design) la wanrah da ki ‘engineer’ napoh ka Ri Slovakia, Europe, kiba la ju mlien ban shna ïa kum kine ki jait ïing.
Haba kren ha ki lad pathai khubor, ka Jana Bednarova, Project Manager and Coordinator jong ka Picasso Pupils – An Art Society, ka la ïathuh ba ïa kane kane ka ïing la tei tang da ki tiar kiba lah ban ïoh na ki shnong ki thaw, kum ki dieng ki siej, skum kba, ka dew byrtha, bad kiwei kiwei ba la pynwandur naduh nabar shaduh shapoh jong ka ïing ha ryngkat ka jingpyndonkam malu mala da ka dewbilat.
Ka Jana Bednarova ka la pyntip ruh ba kane ka prokram mynta ka sngi kam dei ka jingplie ïa kane ka projek, hynrei ka dei ka jingrakhe ïa u mawjam jong ka jingjop ba ki la lah ban pyndep ïa baroh ki bynta jong ka jingtei watla ki dang don ki bynta ba rit kiba dang dei ban pyndep ïa ka jingpynwandur shabar bad kumjuh shapoh.
“Ngi la jop ïa ka jingthmu jong ngi ba ïa ki buit stad kiba la wanrah na Europe, lah ban pyntreikam da ki tiar ki tar kiba don ha kane ka thaiñ, bad da ki briew kiba na kane ka thaiñ,” ong ka Bednarova.
Ka la ong ruh ba shwa ban plie paidbah ïa kane ka projek, donkam ban ai ka jinghikai ïa ki briew kane ka thaiñ ban shimti ïa kane ka projek ym tang kum ka ïing jngohkai, ka jaka bam ne ka café, namar ïa kane ka projek la shna kum ka jaka ïalang ha kaba lah ban pynlong ïa ki prokram bapher bapher na ka bynta ki samla bad ka imlang sahlang. Ka la pynpaw ruh ïa ka jingkyrmen ba shen kin sa ïoh pyndep noh lut khoit ïa kane ka jingtei na ka bynta ka jingmyntoi ki paidbah ka District bad khamtam eh ban kyntiew ïa ki kam jngohkai pyrthei hapoh South West Khasi Hills District.
Ha kane ka prokram la ïadonlang ruh u Bah Micheal Mawroh, Superintending Engineer ka Directorate of Tourism kum u kongsan ha ryngkat ka jingsynranlang u Bah Batkupar Lyngdoh, Assistant Executive Engineer ka tnad Tourism, u Marek Guga bad u Jozef Fugger kiba dei ki Resource Engineer na Slovakia, bad kiwei kiwei de ki riew rangbah.
